Kursaal Zikloaren hasiera bikaina

Atalak: musika kritika

Fitxa: Donostiako Musika Hamabostaldia. Kursaal Auditorioko Zikloa. Euskadiko Orkestra. Zuzendaria: Semyon Bychkov. Egitaraua: Beethoven-en lanak. Lekua: Kursaal Auditorioa. Data: abuztuaren 8a.

Aurten Musika Hamabostaldia desberdina izango da, oso desberdina, baita arraroa ere, baina horrek ez digu eragotziko musikaz kalitate maila altuan gozatzea.

Izan ere, Kursaal Auditorio Zikloaren lehen hitzorduak ordubete zoragarri bat pasarazi zigun, koronabirusaren pandemia egoeragatik protokolo zorrotzak izan arren.

Euskadiko Orkestra sasoi betean dago, konfinamendu-aldi luzearen ondoren. Horrela sentiarazi ziguten kontzertu honetan, non, Semyon Bychkoven batutaz gain, orkestrak berak ere indar eta bizitasun berezia erakutsi zituen.

Saioa laburra izan zen, ordubetekoa, denbora nahikoa horrelako topaketa batez gozatzeko, kontuan hartuta egungo egoeran ez dagoela atsedenik.

Eta, behar bezala aurten, Beethoveni oso-osorik eskainitako egitaraua izan genuen, bere jaiotzaren 250. urteurrenean.

“Coriolano” izeneko do minorreko op. 62 obertura ederrak ireki zuen kontzertua. Bai lehen gaiaren tumultuositatea bai bigarren motiboaren samurtasuna zehaztasunez eta fintasunez azaldu zituen Bychkoven gidaritza handiak, orkestrarekin harreman bikaina izan baitzuen une oro.

Baina kontzertuko plater nagusia ‘3. Sinfonia mi bemol maiorrean,”Heroikoa”, op. 55’ izan zen. Une oro, orkestrak soinu garbia eta fraseaketa sendo eta ausardiaz beterikoa erakutsi zituen. Entzuleak erabat konbentzituta geratu ziren lan honen bertsio honekin eta Kursaaleko lehen saio berezi hau txalo zaparrada batekin saritu zuten.