Musika-mozkorraldia

Atalak: musika kritika

Fitxa: Musika-musica jaialdia. Bilboko Orkestra Sinfonikoa. Zuzendaria: Günter Neuhold. Egitaraua: Brahms-sen 2. Sinfonia op. 73 re maiorrean. Lekua: Euskalduna Jauregia. Data: Martxoaren 8a.

Joan den astuburuan bai izan genuela aukera egun osoa musikaz inguraturik egoteko. Bilbao 700 Fundazioaren eskutik iritsi zen aurtengo Musika-musica jaialdia. Euskalduna Jauregiaren areto guztietan eta orduoro eskaini ziren mota guztietako musika klasikoko saio musikalak; hori bai, aurten Beethoven eta Brahms konpositoreen omenez izan ziren, eta, beraz, haiexek izan ziren kontzertu gehienen protagonistak. Horrez gain, beste leku batzuetan ere aukera izan zuen publikoak musikaz disfrutatzeko. Guzti honi gehitzen badiogu sarrerak merke-merkeak zirela, ulertu daiteke jaialdiak izandako arrakasta. Jende ugari hurbildu zen, eta adin guztietakoa, gauza inportantea kontuan hartzen badugu normalean kontzertuetan adineko jendea besterik ez dela ikusten. Beraz, ekimen positibotzat hartu behar dugu jaialdia.

Saio ugari horien artean, komentatuko duguna Bilboko Orkestra Sinfonikoak egin zuen Brahms-en 2. Sinfoniarena izango da. Errepertorio sinfonikoan lan asko eta ederrak dauzkagu gozatzeko. Dudarik, gabe, Mozart-en sinfonia argitsu eta gardenak, eta Beethoven-en lan indartsu eta jenialak publikoaren faboritoen artean daude, baina Brahms-en mundu sinfonikoaren edertasuna paregabea da. Esaten den bezala, Brahms da azken klasikoa, edo lehen erromantikoa; edo, hobeto esanda, bi estilo horien nahasketa perfektua. Emozioa ez da begi bistakoa bere lanetan, konpositore honen musika ez da sentimendu errazetakoa, oso neurtua baizik, eta, agian horrexegatik, sakonak, benetakoak, barruraino iristen zaizkizun horietakoak dira pizten dituen sentipenak. Bestalde, klasizismoaren eragina du guztiz, eta hori nabaria da obren arkitekturan, perfektua, simetrikoa. 2. Sinfonia honen kasuan, nahiz eta Brahms-en iritziz obra tristea izan, argitsua eta itxaropentsua egiten zaigu. Bilboko Orkestrak bertsio fresko eta ñabarduraz josia egin zuen, Günter Neuhold maisuaren eskutik, oso aproposa musikaren festa zen asteburu horretarako. Oso ongi.