Errusiatik dotoreziaz

Atalak: musika kritika

Fitxa: Musika Hamabostaldia. San Petersburgoko Orkestra Filarmonikoa. Zuzendaria: Yuri Temirkanov. Bakarlaria: Javier Perianes (pianoa). Egitaraua: Ravel eta Elgar-en obrak. Lekua: Kursaal Auditorioa. Data: abuztuaren 17a.

Kontzertu ondo egina eskaini zuen San Petersburgoko Orkestra Filarmonikoak emandako lehenengo saioan. Adierzkortasun handikeririk gabe, emozio izugarririk gabe, baina ona. Eta eskertzekoa da noizean behin espresio puztuta alde batean uztea perfekzio eta soiltasun espresiboa eskaintzeko. Yuri Temirkanov zuzendariaren eskutik dotorezia hutsez disfrutatzeko aukera eman ziguten errusiarrek, hasieratik bukaeraraino.

Kontzertuaren hasierako zatia Ravel konpositoreari dedikatu zioten. ‘Ma mère l’oye’ suite xarmangarria izan zen lehenengo obra. Berez pianorako konposatutako poliptiko txiki honek ez du bere naïf kutsua galtzen bertsio orkestratuan. Eta halaxe, delikatua, sonoritate gardenak eskainiz interpretatu zuen orkestrak.

Beste gauza bat da ‘Sol maiorreko piano eta orkestrarako kontzertua’. Jazzen erritmoek eta giroak liluratu egin zuten Ravel eta modu dotorez agertzen dira kontzertu koloretsu honetan, non euskal ikutua ere begibistan dago, batez ere lehenengo mugimenduan. Javier Perianes pianistak primeran azpimarratu zuen obra honek duen zorroztasuna eta aldi berean misterioa. Teknikoki bertsio akatsgabea egin zuen, eta alde interpretatibotik begiratuta orkestraren bide dotore eta soiletik ibili zen. Une batzuetan urtu egin ziren pianoa eta orkestra, efektu magikoak lortuz.

Amaitzeko, Edward Elgar-en lan bitxi bat. ‘Op. 36 bariazioak –Enigma bariazioak-‘ obran, joku bat egiten du konpositoreak, non zati bakoitzean bere lagun bat ‘sketch’ musikal baten bidez deskribatzen du. Inprobisazio baten kutsua du lanak, ederra eta dibertigarria. Yuri Temirkanov zuzendariak obratik mamia ateratzen jakin zuen, soinu fin eta enpastatua lortuz.