Zapateatuaren erregina

Atalak: musika kritika

Fitxa: Musika Hamabostaldia. Sara Barasen Ballet Flamenkoa. ‘Voces’ ikuskizuna. Zuzendaria eta koreografoa: Sara Baras. Musika: Keko Baldomero. Artista gonbidatuak: José Serrano eta Tim Ries.

Sara Baras arrakasta segurua da. Aurtengoa bere hirugarren bisita izan da Musika Hamabostaldira eta, aurrekoetan bezala, publikoa txundituta utzi zuen. Indar eszeniko ikaragarria du Baras dantzari eta koreografoak. Horrez gain, badaki espektakulu eleganteak egiten, estetika kitsch horietatik ihes egiten dutenak. Azken batean, flamenkoa gustatu edo ez, atseginak dira bere muntaiak.

‘Voces’ izeneko ikuskizunarekin Sara Barasek eskerrak eman nahi dizkie gure artean ez dauden artista batzuei (Paco de Lucía, Camarón, Enrique Morente, Moraíto, Antonio Gades eta Carmen Amaya) flamenkoaren munduan egin dituzten ekarpenengatik, bakoitzak bere eremuan. Eta aitzakia honekin, flamenkoaren ‘palo’ guztietatik pasatzen den lana da Voces.

Sara Barasek zapateatu sinestezina egiten du, doia, perfektua, eta karisma izugarria du taula gainean. Baina berarekin indar berebiziko artistak disfrutatu genituen, batez ere José Serrano dantzaria, Soleá aparta egin zuena, eta Barasekin batera Bulería txundigarria dantzatu zuena. Eta Tim Ries saxofoi jolearen parte hartzeak puntu-puntuan egon ziren.

Honaino, dena ondo. Halere, luzeegia izan zen espektakulua atsedenik egin gabe, eta bi ordu pasa eta gero monotono samarra suertatu zen. Beste aitzakia bat: gidari-hari gisa omendutako artisten hitzalditxoak entzuten ziren, eta horrek ez zuen gehiegi aportatzen. Artista onak ziren flamenko munduan, eta hori izan zen aportazioa. Haien filosofia ez zen hain interesgarria.