Gogoetarako momentu bat

Atalak: musika kritika

Fitxa: Kursaal Eszenak antolatutako Haendel-en ‘Mesias’. Gabrieli Consort and players. Zuzendaria: Paul McCreesh. Bakarlariak: Sarah Tynan (soprano), Tim Mead (kontratenorra), Stuart Jackson (tenorra), George Humphreys (baxua). Lekua: Donostiako Kursaal Auditorioa. Data: abenduaren 22a.

Santo Tomas egunaren zoramenaren ondoren eta Gabonetako ospakizun eroen aurretik oso aproposa suertatu zen Kursaal Eszenak eskainitako kontzertua. Haendel-en ‘Mesias’ maisu lan unibertsala entzutea beti da gozamena, baina aldi honetan, gozamena benetako plazer bihurtu zen Gabrieli Consort and players taldearen eskutik. Paul McCreesh-ek sortutako taldea antzinako musikaren erreferente garrantzitsuenetako bat da munduan, eta, saio hau entzun ondoren, begi bistan dago zergatik. Interpretazioaren fintasuna, antzinako soinu tresnekin lortutako soinu bikaintasuna eta, batez ere, ahotsen dotorezia izan ziren ezaugarri nagusiak uneoro, hasieratik bukaeraraino. ‘Mesias’ oratorioak, Charles Jennens-en testuan oinarrituta, Jesus-en bizitza osoaren errepasoa egiten du, nahiz eta ohikoa den Gabonarekin lotzea. Pasarte bibliko desberdinak eskaintzen ditu, emozioz beterikoak, Haendel-en musikaren bidez.

Lehen esan bezala, lan instrumentala primerakoa izan zen. Soinua uneoro orekatua entzun genuen, eta efektu berbera lortu zuen koruak, hain ongi enpastatua. Bai gozotasuna, bai adorea behar zenean, perfektuki islatu ziren, inongo ertzik agertu gabe.

Bestalde, bakarlariek txunditu egin gintuzten. Stuart Jackson tenorrak eta Sarah Tynan sopranoak paper akatsgabeak egin zituzten, distiratsuak, baina benetako disfrutea George Humphreys baxuarekin eta batez ere Tim Mead kontratenorrarekin iritsi zen. Humphreys-ek mila ñabardura erakutsi zizkigun bere kantuan, eta Mead-en ahots argitsu eta ongi kontrolatua ezin hobeki egokitu zen obrara. Benetako kontzertu magikoa garai honetan.