Tosca unibertsala

Atalak: musika kritika

Fitxa: Gioacomo Puccini-ren “Tosca”. Bilbao Orkestra Sinfonikoa. Zuzendaria: Bertrand de Billy. Bilboko Operaren Abesbatza. Zuzendaria: Boris Dujin. Eszena zuzendaria: Nuria Espert. Bakarlariak: Violeta Urmana, Massimo Giordano, Falk Struckmann eta Miguel Ángel Zapater. Lekua: Bilboko Euskalduna Jauregia. Data: Urtarrilaren 19a.

Opera, gauza bikain gehienekin gertatzen den bezala, edo maite duzu, betirako, edo gorrotatzen duzu, baina badaude titulu batzuk benetan zabalduta daudenak eta popularrak direnak zaleak ez direnen artean ere. Hauetako bat, dudarik gabe, Pucciniren “Tosca” da. Pucciniren asmamena melodia zoragarriak egiteko, istorio ezin dramatikoagoa… dena nahasten da maisulan ezin ederragoa osatzeko.

Miila aldiz entzun dugu “Tosca”, baina aldi honetan zur eta lur geratu ginen, hain soil baina zirraragarria zen eszenografiarengatik, eta, batez ere, bakarlarien interpretazioarengatik.

Violeta Urmana soprano lituaniarra, gaur egungo errepertorio liriko-dramatiko italiar eta alemaniarraren interprete garrantzitsuenetako bat da. Indarra du, sinistu egiten ditu bere pertsonaiak, eta Floria Tosca ausarta eta taxuduna egin zuen. “Vissi d’arte” aria famatuaren bertsio hunkigarria egin zuen, mindua. Pena, itxurak ez diola laguntzen heroinaren pertsonaiaren sinesgarritasuna lortzeko. Baina gaueko benetako txapelduna Massimo Giordano tenorea izan zen. Ahots argitsua du, oso, eta publikoa konbentzitu egin zuen inongo afektaziorik gabeko interpretazioarekin. Oso abeslari naturala iruditu zitzaigun Giordano. Hirugarren ekitaldiko “E lucevan le stelle” aria, opera guztien artean aria zoragarrienetako bat, sentitua eta haragitsua iritsi zitzaigun. Hau izan zen lehenengo aldia ABAOn Massimo Giordano-rentzat. Espero dugu gehiago entzutea Euskal Herrian. Lehenengo aldiz abesten zuen ABAO-n Falk Struckmann baritono alemaniarrak ere, obrako bilauak, il Barone Scarpia eginez. Nahiz eta marrantaturik egon, iragarri zuten bezala, ongi bete zuen bere papera eta ezin hobeki irudikatu zuen sadikoaren rola.

Bilbao Orkestra Sinfonikoa eta BIlboko Abesbatza, ongi.