Erabat eraginkorra

Atalak: musika kritika

Fitxa: Musika Hamabostaldia. Mozart-en ‘Don Giovanni’ opera. Euskadiko Orkestra Sinfonikoa. Zuzendaria: Manuel Hernández Silva. Easo Abesbatza. Zuzendaria: Xalba Rallo. Bakarlariak: Christopher Maltman, José Fardilha, Daniel Giulianini, Irina Lungu, Toby Spence, Nicole Cabell, José Manuel Dïaz, Miren Urbieta-Vega. Lekua: Kursaal Auditorioa. Data: abuztuaren 13a.

Badakigu opera dela ikuskizun konpletoenetako bat: musika, dramatizazioa, kantua… hau guztia baloratu behar da opera batean. Hori esanda, hanka bat kentzen bazaio osotasunari, ikuskizuna ahuldu egiten da, nahi eta nahi ez.

Baina, batzuetan ez dago beste erremediorik. Opera baten muntaia oso garestia da eta gaur egun konplikatua da aurrekontu nahikoa izatea holakoak eskaintzeko.

Aurtengo Musika Hamabostaldian izan dugu gure opera razioa. Eta oso ondo. Mozart-en ‘Don Giovanni’-ren emanaldia ez da izan antzeztutako produkzioa, baizik eta erdi-dramatizatua. Erdibidekoa, nolabait esateagatik. Taula gainean orkestra zegoen, eta atzekaldean, tarima altu batean, abeslariak. Ideia ona, eta batez ere, eraginkorra, Salva Bolta-rena. Bakarlariak mugitzen ziren, espektakulu adierazkor eta dinamikoa eginez, eta entzuleak pozik atera ziren. Ez da ideala, baina errealistak izan behar dugu, eta onartu behar da trikimailu txukuna izan zela.

Koalitate musikalen aldetik, primeran. Euskadiko Orkestra Sinfonikoa puntu-puntuan ibili zen, fin, doitasunez uneoro, Easo Abesbatza bezala. Bakarlariei buruz, gauza onak besterik ezin dira esan, José Fardilha baritonoa alde batera uzten badugu. Leporello adierazkorra egin zuen, hori bai, baina oso desafinatua hasieratik bukaeraraino. Pena. Christopher Maltman, Don Giovanni protagonista, ondo aritu zen, bai ahotsez, bai jarreraz, pertsonaia konbentzigarria eginez. Nicole Cabell-ek ahots ederra luzitu zuen Donna Elvira pertsonaian, eta Irina Lungu-k Donna Anna elegantea abestu zuen. Azpimarratuko nituzke Toby Spence tenorea, oso argitsua, eta Miren Urbieta-Vega, kementsu eta segurua Zerlina-ren rolean, nahiz eta batzuetan boteretsuegi ibili José Manuel Díaz-en ondoan.

Laburbilduz, ondo egina, praktikoa eta gustu onekoa.