Erabateko jariakortasuna

Atalak: musika kritika

Fitxa: Musika Hamabostaldia. Euskadiko Orkestra SInfonikoa. Zuzendaria eta pianoa: Christian Zacharias. Andra Mari Abesbatza. Zuzendaria: Andoni Sierra. Abeslariak: Alicia Amo (sopranoa), Clara Mouriz (mezzoa), Martin Miterrutzner (tenorea), Peter Harvey (baritonoa). Egitaraua: Joseph Haydn, Mozart eta Michael Haydn-en obrak. Lekua: Kursaal Auditorioa. Data: abuztuaren 18a.

Christian Zacharias piano jole eta zuzendaria aipatzeak kalitatea bermatu egiten du, eta aldi honetan frogatuta geratu zen. Hiru obrez osatutako egitaraua benetako oparia izan zen entzuleentzat. Obra bakoitzak interpretazio akatsgabe eta inspiratua izan zuen, dudarik gabe.

Hasteko, Joseph Haydn-en ‘49. Sinfonia fa minorrean’ entzun genuen, malgua, ñabarduraz beterikoa, gozoa. Baina benetako festa Mozart-en ’24. Piano eta orkestrarako do minorreko kontzertua’ lanarekin iritsi zen. Pianoa eta orkestra benetan urtu egin ziren. Zacharias-ek bertsio kameristikoa egin zuen, oso intimo eta delikatua, baina aldi berean indartsu eta adoretsua. Euskadiko Orkestra Sinfonikoa inoiz baino doiagoa iritsi zitzaigun, eta Zacharias-en aginduak primeran jarraitu zituzten.

Saioaren bigarren zatian oso gutxitan programatzen den Michael Haydn-en (Joseph-en anai txikia) ‘Requiem-a’ do minorrean entzun genuen. Lan ilun eta tragikoa da requiem hau, baina zinez ederra. Izan ere, requiem honek Mozart bera inspiratu zuen berea konposatu zuenean.

Luxuzko bakarlariak izan genuen. Alicia Amo sopranoak ahots distiratsua luzitu zuen uneoro. Clara Mouriz mezzoak ere kantu zoragarria oparitu zigun. Martin Mitterrutzner tenoreak ahots erabat gardena erakutsi zuen eta Peter Harvey baritonoa taxuz aritu zen. Andra Mari Abesbatzak, bestalde, primerako interpretazioa egin zuen, oso enpastatua eta malgua.

Saio biribila.