Klasizismo hutsa

Atalak: musika kritika

Fitxa: Bilbao Orkestra Sinfonikoa. Zuzendaria: Frank Beermann. Bakarlaria: Denis Zhdanov (pianoa). Egitaraua: Aragüés, Mozart eta Brhams-en obrak. Lekua: Bilbaoko Euskalduna Jauregia. Data: Apirilaren 12a.

Aldi honetan, proposamen kuriosoa egin zigun Bilboko Orkestra Sinfonikoak. Hiru obra eskaini, bakoitza garai batekoa, baina hirurak klasiko-klasikoak. Tomás Aragüés Bernad musikari ezaguna da Euskal Herrian. Donostiako Kontserbatorioko zuzendari eta irakaslea izan zen, eta ia-ia hemengo musikari guztiok haren eskuetatik pasa gara. Elizako musika asko konposatu du eta bere estiloa, nahiz eta gaur egun egina izan, klasizismo eta erromantizismoan errotuta dago, begibistan geratu zena Bilboko orkestrari dedikaturiko “Kontrapuntu eta polifonia atseginei buruz” izeneko obran, saio honetako lehenengoa, hain zuzen ere. Kutsu errenazentista, erromantikoa du lan honek, fantasia modukoa, kontrapuntu eta fugaz beterik, orkestrazio oparokoa, baina ezer berririk aportatzen duena. Halere, tituluan esaten den bezala, oso atsegina.

Plater nagusi gisa, Denis Zhdanov piano jole ukrainarra ekarri ziguten. Jakin-mina eta gogoa genuen Zhdanov entzuteko, orain dela hiru urte María Canals piano lehiaketa famatuaren irabazlea izan baitzen, 22 urte besterik ez zuela. Hala ere, hotz utzi gintuen, egia esan. Mozarten “27. kontzertua piano eta orkestrarako Si bemol maiorrean, K.595” jo zuen, xuxen eta doi, baina besterik gabe. Hori bai, propina gisa, Vladimir Horowitz-en “Carmen-en gai bati buruzko barioazioak”, oso pianistikoak, primeran jo zituen, era biurtuosistikoz. Horixe du bere estiloa. Agian Mozarten sakontasuna handitxo gelditzen zaio oraindik.

Eta kontzertua amaitzeko, Brahmsen sinfonia eder bat jo zuten, “4.a, Mi minorrean, op. 98”, erromantikoa egin zen garaia kontuan hartzen badugu, baina oso egitura klasikoa duena. Soinu nortasundunez iritsi zitzaigun, Frank Beermann zuzendariaren eskutik. Hasierako Allegro ma non troppo elegantea atera zen, eta bukaerako Allegro energico e apassionato, benetan erakargarria. Oso ondo.