Sormen idazketako irakasle bati ez diote kontratua berritu UNEDen, Urrutiko Hezkuntza Unibertsitatean, Espainiako Estatuan. Errektoretzak esan du zaharra dela, heldu zaiola erabateko erretiroa hartu eta ardurak uzteko garaia, hobe duela etxera joatea. Emakumeak 70 urte ditu. Batek baino gehiagok pentsatuko du ez zaiola arrazoirik falta unibertsitateari, eta emakumeak hobe lukeela akaso beste aldera pasatzea, idaztera, irakasteari utzita.
Lau lerroko mezu elektroniko baten bidez jakinarazi zitzaien erabakia ikasleei. Segituan erreklamatzera jo zuen ikasle batek; 80 urte ditu gizonezkoak. “Seniorrak” dira ikasleak, helduei eta bereziki adinekoei zuzenduriko ikasgela da. Gustura zebilen irakaslea, urteak zeramatzan horretan, eta tratu fina egina zuen ikasleekin.
Irakasleari lanpostua kendu diote “zaharra” delako, baina badira ikasle batzuk adinez bera baino zaharragoak direnak. Zergatik adinekoek ezin dute irakatsi, baina bai ikasi?
Galdera ikurra daraman lelo hori harridura ikur inplizitu bihurtuta, manifestatu egin dira ikasgela horretako ikasle asko eta asko, tartean irakaslea ere bai. Hausnarketa egiteko eskatu du 70 urteko emakumeak, sormenak mugarik eta adinik ez duela kontenplatzen esanaz.
Duela egun batzuk zendu da María Teresa Campos kazetaria, Espainiako aurpegi ezaguna telebistan eta irratian, urte luzez goizetako saioak aurkeztu dituena. Ofizioko kide askok goratu dute haren lana, baina interesgarria da bere alabak omenaldian esandakoa: “Inork ezin zaitu erretiratu, publikoak soilik egin dezake; niri inork ez nau erretiratu. Hori esaten zigun amak”.
UNEDeko irakaslea erretira ez zezaten sinadura bilketa abiatu eta 50.000 pertsona baino gehiagoren babesa bereganatu dute. Publikoak erantzun du, ez du emakumea erretiratzerik nahi, eta errektifikatu egin du errektoretzak: kontratua berrituko diote 70 urteko irakasleari.
