“Ilegala banaiz, alda zuen legea”

Atalak: Elkarlanak, Komunitatea

Horrela dio Willis Drummond talde lapurtarraren letrak, eta aste honetako artikulurako ezin egokiago datozkit hitzok. Inor ez da ilegala leloa hartuta dago jada errefuxiatuen eta etorkinen aldeko aldarrirako bandera moduan. Askori egiten zaigu ezagun. Aldarrikapen horrekin bat egiten du ARGIAk ere, eta kamisetak jarri berri dira salgai lema horretxekin.

Ez da, ordea, hor bukatzen. Gogoratzen orain hilabete pasatxo Bilboko kale-saltzaileen inguruko erreportaje hura? Astekariko azal latza zuen; oroitzen? Bada kale-saltzaile horien eskubideak borrokatzeko lanean ari den Mbolo Moye Doole elkartearekin elkarlanean egindako tixertak dira orain ARGIAren Azokan salgai daudenak. 15 eurogatik eskuratu daitezke, eta horietatik 2 euro Bilboko kale-saltzaileen elkartearentzat dira. Diru-iturri txiki bat? Bai, noski; baina ez hori bakarrik: Euskal Herrian beraien aldarrikapena jendeak jantzita eramatea oso garrantzitsua da.

Euskara izan dadila lotura

Euskaraz eta wolofez idatzita dago inor ez da ilegala. Zergatik wolofez? Senegaldarra baita Bilboko kale-saltzailen elkarteak biltzen duen komunitatea. Eta zergatik euskaraz? Euskal Herrian gaur egun dagoen jatorri aniztasuna ikusita, euskara nahi dugulako izatea munduko edozein lekutan jaiotakoarekin komunikatzeko eta bizitzeko tresna. Hortxe du erronka gure hizkuntzak. Horixe dugu erronka euskaldunok. Zergatik egin gazteleraz edo frantsesez hizkuntza horiek ama-hizkuntzatzat ez dituen norbaiti? Zergatik ez diogu euskaraz egiten, gure arteko lotura hori izan dadin?

Bete-betean dagoen leloarekin ados, pertsonak munduan libre ibiltzeko eskubidea aldarrikatu nahi da ekintza honekin, eta ez pertsonak ilegal diren aitzakian dirua munduan nahieran mugitu. Jo-puntuan dagoen kolektiboa da kale-saltzaileena (besteren artean), baina euskaldunok ere ondotxo ezagutzen dugu zer den ilegalizazioa, eta oraindik ere munduko hainbat txokotan ilegal egotea.

Kamixeta 15 euroan eros dezakezu ARGIAren Azokan.