[Itsaso Zubiria Etxeberria]
Komunikazio eta publizitate kanpaina arrakastatsuak antolatzeko geroz eta jende gehiago dago. Oso jende prestatua, karrera bat (gutxienez), master bat (gutxienez hau ere) eta ikastaroz betetako curriculumarekin. Bueltan-bueltan denok sartzen gara marketinaren jokoan eta egiten dugu kanpaina bat, gure izena eta marka azpimarratuko duen lanen bat, festaren bat… Baina begira zein den benetako publizitatea, publizitate ona eta publizitate sinesgarria.
Irakurri euskaraz kanpaina egin dute Zizurkilgo Plazida Otaño liburutegian Euskaraldiaren bueltan. Liburutegiko erabiltzaile diren eta euskaraz irakurtzen duten hainbat herritarrek bideo labur batzuk grabatu dituzte euskaraz irakurtzera bultzatzeko helburuarekin. Horietako bat da Ander, eta ARGIAz hitz egin du liburutegiak berak sare sozialetan zabaldu dituen bideoetako batean. Eta nola ez, hark gutaz hitz egin badu, nik berarekin hitz egin beharra neukan!
Geografoa da Ander ikasketaz, eta ez du publizitateko masterrik egin, lurralde antolaketa eta ingurumeneko graduondokoa baizik, Zaragozan. Gustuko du gaia, eta parte hartzen duen herri mugimenduetan hirigintzaren, ingurumenaren, lurralde antolaketaren bueltako ikuspegia ematen ahalegintzen da: “Daramagun bizimodu desarrollista honetan desazkundearen ideia lantzea garrantzitsua da”, dio zizurkildarrak.
Zergatik aipamen berezia ARGIAri?
Horixe izan da nire galdera. Ikuspegi desberdinetatik landu dituzte bideoak, eta “ideia ona” iruditu zitzaion berak prentsaz eta bereziki ARGIAz hitz egitea, asteroko irakurlea baita. “Gaur egungo kazetaritza estandarretik aparte Euskal Herriko jendarteko gaiak lantzen ditu eta hori interesatzen zait niri”, azaldu du. “Gai lokalak ikusarazten dira, euskara edo ingurumena bezalako gaiek pisu handia hartzen dute astekarian eta hori asko gustatzen zait, eta beste hedabideetan aurki ez dezakedana topatzen dut hemen”.
Ez da harpideduna, baina bai aldizkariaren irakurle fina. ARGIA jendea. Eta zein polita den euskaraz irakurtzera bultzatzeko ARGIA erabiltzen dela ikustea.