Familia handituz

Atalak: Argia Jendea mintzo, Komunitatea

[Itsaso Zubiria Etxeberria] 85 gehiago gara. 85 izen-abizen. 85 etxe. 85 dira hemendik aurrera euskara ofiziala ez den eremuetan euskara ikasten ari diren lagunengana doan bidaliko ditugun aldizkariak. Ipar Euskal Herriko, Nafarroa erdiko eta Trebiñuko 85 pertsonak baliatu dute aukera –gogoratu iragan azaroan ARGIAk egindako kanpaina– eta pozarren jaso ditugu bakoitzaren arrazoiak eta lehen astekaria jaso ondorengo euren argazkiak.

Euskal Herri osoko leku gehienetan euskaraz bizitzea zaila bada –ahoak bizi-bizi eta belarriak prest, baina eskua zabal-zabalik iristen da zaplaztekoa edozein bazterretatik–, aipatu berri ditudan eremu hauetan aurkako korronte erdalzalea oraindik ere indartsuagoa da zoritxarrez, eta beraz, ARGIAko lantalde osoarentzat plazera izango da gure lana eta gure hizkuntza astero lagun hauekin partekatzea. Gure komunitatea zaindu nahi dugu. Ahalegin bat eskatzen du 85 harpidetza gure gain hartzeak, baina atsegin da euskara ofizial ez den 85 etxe gehiagotara iritsiko dela jakitea.

Animo eta esker oneko hitzak besterik ez ditugu euskara ikasteko bidean murgilduta dauden lagun guztientzat, eta ez dugu ahazten oraindik euskara ikastea ez dela doakoa eta beharrezkoa dela neurri hori hartzea, bidea erraztea, oztopo ekonomikoa kentzea eta euskara eskura jartzea.

Eta milesker zuri ere, ARGIAko kide, zure ekarpenari esker egiten baititugu posible halako kanpainak.

Artikulu hau irakurtzen ari zarela, oraindik ez zarela ARGIAkoa eta piztu zaizula gogoa horrelako elkartasun ekimenak bultza nahi dituzulako? Zuretzat ere bada mezu hau, zurekin bat gehiago izango baikara. Elkartasunean oinarritutako harpidetza eredua da ARGIArena. Agure zaharrak zioen: “Hik tira gogor hortikan, ta bultza nik hemendikan”. Ez dakit laster eroriko den, baina tira gabe ez, seguru.