[Itsaso Zubiria Etxeberria] Ez dago ezer arriskutsuagorik 100 urteko historia hamar minutuan kontatzen saiatzea baino. Eta zurea ez den hizkuntza batean egitea, ia ausarkeria! Baina ausart egin du lan hori Lander Arbelaitzek, Danimarkatik Euskal Herrira etorritako mugimendu kooperatibistako hogei lagunen aurrean. Zergatik hamar minutuan bentilatu mende bat? Azken hamarkadetako ARGIAren pauso, aldaketa eta berrikuntzei tarte handiagoa eskaintzeko; lehengoaren zantzu batzuk ezagututa hobeto ulertzen baita gaurkoa.
Lauzpabost eguneko bira egin dute danimarkarrek Euskal Herrian barrena, Olatukoopen bueltako mugimendu, enpresa eta taldeak ezagutzeko asmotan. ARGIAren erredakzioa eta Antza inprimategia bisitatu dituzte apirilaren 24an Lasarte-Orian, eta Arbelaitz izan dute bisitaren gidari. Enpresa eredua azaldu die, 1980ko hamarkadan Ametzagaina taldea sortu eta langileek kaputxinoei enpresa erostean, zenbait familiak egindako apustu arriskatuekin, nola eraiki zituzten oinarriak gaur egun ARGIA dena izateko. Eta, batez ere, azaldu die lantaldeak azken hamabost urteotan hartutako norabidea. Hitz egin die zuzendaritza ereduaz, figura bakar eta hierarkiko hori ezabatu eta txandakako zuzendaritza antolatzeaz; hitz egin die langileek enpresan duten parte-hartzea indartzeko egindako planaz, lantaldeen antolaketaz; lana eta bizitzak uztartzeko dituzten irizpideez, norberaren arduratik eta besteekiko errespetutik, laneko malgutasunaz; horizontaltasunaz eta oinarrizko soldata berdina izateaz…
Noski, harpidetza ereduan ere sakondu du Arbelaitzek: “Urteak generamatzan harpidetzetan beheranzko joera izaten eta 2008ko krisiak gogor kolpatu gintuen gu ere. Azaldu diegu, hain justu azken urteotako aldaketa hauen guztien artean harpidetza sistema aldatzea izan dela apustu handietako bat; harpidedunak pasa direla produktu bat ordaintzetik proiektu bat babesteko dirua jartzera”. Horrek eskatzen zuen kazetaritza konprometituagoa eta sozialagoa egitea edo gai periodistikoak lantzetik gai horiek lantaldean aplikatzera pasatzea, besteren artean.
Ideia-zaparrada buruan itzuli dira daniarrak etxera. ARGIAk beste kontaktu batzuk apuntatu ditu aliantzen agendan.
