[Itsaso Zubiria Etxeberria] Belaunaldi osoak markatzen dituzten publizitate kanpainak ezagunak dira. Eman buruari pixka bat eta minutu batean baietz bat baino gehiago atera. Niri Colacao-ren kanta –arrazista samarra, portzierto– edo Nocilla-rena etorri zaizkit gogora berehala. Bakoitzak ditugu gure erreferentziak, baina zenbat slogan eta kanta sartzen dizkiguten barru-barruraino saltzaile handiek. Zein onak diren kabroiak. Herri txiki honetan espainolezkoak eta frantsesezkoak dira nagusi gure buruetan, baina bada Euskal Herri osoan aspaldi ezagun den eta oraindik funtzionatzen duenik. Zergatik aldatu? Ika ika ika…
1980. urteko afari batetik sortutako ideia hasiera batean suizida samar batek oraindik ere bi urtero ilusioa pizten du, herri batean sartzen ikusten direnean koloretako argiak, entzuten denean musika eta sumatzen direnean bozgorailuetako animo ahotsak. Testigua badatorrela sentitzean. Lehengo urtean izan behar zuena beranduxeago badator ere, iritsi da eta ARGIAk urtero moduan jarriko du bere aletxoa.
Lasarte-Orian egiten dute ARGIAko lagunek kilometroa, Antza inprimategiko kideekin batera, euskalgintzan diharduten bi enpresaren arteko lotura irudikatuz. Aurten, gainera, Ametzagaiña talde berekoa den Iametza ere batuko zaie.
Txartel hotelaren aurreko biribilgunean tokatuko zaie Amurriotik bueltan Donostiarako bidean den testigua eramatea, apirilaren 8an goizeko 7:10 inguruan. Gogotsu dago lantaldea euskararen aldeko ekitaldirik jendetsuenean parte hartzeko, eta bere komunitate osoari, lagun guztiei, gonbita luzatu nahi die kilometro horretara gertura daitezen; ARGIA ez baitu lantaldeak bakarrik egiten, irakurleek eta lagunek ere bai, denon arteko lotura estua euskara baita.
Egin dezagun korrika euskaraz, baina ahaztu gabe egunero oinez ibiltzea ere euskaraz ederragoa dela, egunero kantatzea eta kontatzea ere euskaraz xarmantagoa dela, egunero erosketak egitea ere, dela politagoa euskaraz. Egin dezagun Korrika hamaika egunez, egunerokoan euskaraz hitzekin dadin.