Sautrela ez da desagertuko, keba

Gorka Bereziartua
5

Hasier Etxeberria, Sautrela saioaren aurkezlea, programan Asel Luzarraga elkarrizketatzen

“Sautrela ez da desagertu” irakurri genuen atzo Hitzen Uberan webgunean. “Ez dugu horrelako erabaki bat hartu. Batzuetan 26 atal egin dira urtean, beste batzuetan 33. Aurten, 13 dira egingo ditugun atalak”. Aurrera begirako zehaztasunik ez Joselu Blancok. Datorren urtean beharbada 6? Agian 3? Akaso 0? Baina zer diok? Sautrela ez duk desagertu: tabako bila joan duk, berehala zetorrek bueltan. Seguru ia urtero emitituko dituztela programa berriak aurrerantzean ere: ia emitituko dituzte 2013an, ia emitituko dituzte 2014an, ia emitituko dituzte 2015ean… Ez dute Sautrela telebistatik kendu nahi, ez, ez, eta ez. Solo ke, El Conquistador del fin del mundoren arrakasta ikusita eta Célinen nobela gomutan, Gauaren muturrerainoko bidaia izeneko saio berriari ekingo diote aurki.
Hemen behean, programa pilotua.

Ez gaitzatela engaina, Sautrela desagerrarazi nahi dute. Telebista programak ezin dira izan talde armatuen zelula lokartuak bezalakoak, orain gordean, orain aktibo, hiru hilabetez emititu eta gero ikusiko dugu ea muniziorik badagoen zuentzat. A, ba ez, sentitzen dugu, Patricia Gaztañagaren komandoak baliabide gehiago behar ditu. Logistika arazoak dira, e-ko-no-mi-ko-ak… Badakizue gauzak nola dauden, tele-terrorismoak ere garai zailak bizi ditu eta ekintzaile espezializatuenak bakarrik liberatu ditzakegu. Gainontzekoei, ba, deituko dizuegu hauetako batean si eso. Saioa egin duten profesionalak telefonoaren ondoan egongo dira zain. Bai. Eta bitartean, hodeiak bazkalduko dituzte.
Gaiak daukan dimentsioa dauka. Sautrela euskal literaturarentzat eskaparaterik onenetakoa da; eta halere, isil-isilik geratuko gara, “audientzia txikia zeukan”, “ez zegoen sosik, zer nahi duzu ba”, konturatu gabe horrelakoak direla benetako erabaki politikoak EITBn. Kulturari eskainitako espazioak kentzeak kalte handiagoa egiten baitio “herri proiektu”-ari informatiboen ildo editorialak baino.
PS: Udazkenean ere kontu honekin bueltaka ibili ginen, sosegatuago, akaso.

5 Iruzkin
Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

ARGIAko Blogarien Komunitatea - CC-BY-SA