Duela denporatxo bat, urtetxo batzuk, feminista boterezale batzuek, arerio gizonezkoen aurrean, enpoderatzeko deia egin zieten gainontzeko emakumeei.
Laster, Nazio Batuen Erakundeak, Munduko Bankuak eta nazioarteko beste hainbat erakundek berendu zuten enpoderamenduaren diskurtsoa, eskulan merke gisa emakumeen kanpolaneratze masiboa bultzatzeko erabili zutenak.
Erakunde horiek eta feminista haiek, emakumeen gizonekiko atzerapena, haien mendetako esplotazioa eta haien oraingo miseria zurigarritzat erabili zituzten beren helburuak lortzeko. Euren burua nondik-handik aupatu bai, emakume gehienek ez zuten ekimen hartatik on haundirik hartu; kontrakoa, esplotatuagoak izatera igaro ziren.
Bere Larruazalaren periferiaz haraindi-n, idatzi du Silvia Federicik: “Nazio Batuek eta erakunde feminista liberalek begi onez ikusi eta gogo onez ospatzen dituzte emakumeek askapenerantz egin omen dituzten urrats handiak; alabaina, emakume gehienek egoera ezin beltzagoa bizi dute. Jakina [denarekin ere, emakumeek eginiko aurrera-pauso batzuk aipatzen ditu segidan Federicik:] familiarekiko eta gizonenganako dugun lotura ez da inondik ere iraganekoa bezain estua […]; ezkontza-kopurua minimo historikoetara iritsi da, eta emakume gehienek soldatapeko lan bat dute”.
Aurrera-pauso horiek, emakume gehienek bizi duten egoera “ezin beltzagoarekin” zerbait ikustekorik ote duten, galdetzen du batek. Familiarekiko loturetatik askatzea edo soldatapean lan egitea, kasu, libertate bidean aditu eta balia zitezkeenak, ez ote diren menpekotasun haundiagoaren bidean aditu eta baliatu izan: gizonak eta emakumeak areago bakantzeko eta esplotatzeko bidean.
Emakumeen berezko ahalmena, gizonezkoen berezko ahalmena ere, batzuei eta besteei beren sexuak ematen diena, baztertu ezezik, tripetaraino ukatzen du botereak. Ez zait egokia, “boterea”, ez subsistentziaren munduan, ez gogokoa dugun munduan ere, gizonek eta emakumeek dituzten harremanez ari izateko.
Heldu ziren, bada, emakume bakan batzuk, boterearen esferetara. Gizon boteretsuekin bat eginda, esfera horietatik ari zaizkigu; olatu haundia beren alde izateak, galeraren abangoardian egoteak ematen dien sufizientziaz ari zaizkigu.