Klaseduna

Atalak: musika kritika

Stefan Asbury orkestra zuzendaria.

Fitxa: Euskadiko Orkestra Sinfonikoa. Zuzendaria: Stefan Asbury. Bakarlaria: Alina Pogostkina (biolina). Egitaraua: Pesson, Berg eta Beethovenen obrak. Lekua: Gasteizko Principal Antzokia. Data: 2013ko urtarrilaren 17a.

Klasea, edo dotorezia, kasu gehienetan, ez da ikasten. Edo norberak dauka, edo ez dago ezer egiterik  Dotorezia oso inportantea da bizitzaren arlo guztietan, eta musikan are gehiago. Baldarkeria ugari, gehiegikeria galantak topatzen ditugu egunero taula gainean. Horrexegatik, zerbait berezia aurkitzen denean, txalotu eta disfrutatu egin behar da. Alina Pogostkina biolin jole errusiar/alemaniarrak ez du bakarrik ondo jotzen bere instrumentua, ez dauka bakarrik fraseo esanguratsua; jotzeko era elegantea du, oso. Bere musikaltasuna ez da fortzatua edo teatrala, naturala baizik, eta hor datza bere klasea. Alban Berg-en “Biolin eta orkestrarako kontzertua” obran maisuki nahasten dira Schoenbergen dodekafonia-teknika eta estilo “sasi-tonala”, eta jolearentzat ez da erraza “puntua” hartzea lan honi. Pogostkinak ezin hobeki atera zituen obraren “lilurak”: hasierako alaitasuna eta bukaerako etsipena. Zoragarria benetan.

Baina goazen aztertzera Euskadiko Orkestra Sinfonikoak eskaini zigun abonu-kontzertu hau bere osotasunean. Lehenengo zatian, Berg-ekin batera, erabateko estreinaldia eman ziguten: Gérard Pesson-en “Ravel à son âme”. Ziburuko maisuaren distiraz beteriko obra txiki eta iradokitzaile hau ederki atera zen, ehundura sonoroaz josia.

Beste mundu batean murgildu ginen bigarren zatian, Beethovenen “8. Sinfonia, fa maiorrean” obrarekin. Maisu alemaniarraren lan alai honetan aukera izan zuen Euskadiko Orkestrak bere osasun ona azaltzeko. Bai soka, bai haizeak ongi eta taxuz aritu ziren, Stefan Asbury zuzendariaren batuta exijentearen pean.