Kalitate endekatua

Atalak: musika kritika

Fitxa: Kieveko Armadako Abesbatza, Balleta eta Orkestra (Promoconcert-ek antolatuta). Zuzendari artistikoa: Antoniyc Dimitry. Koruaren zuzendaria: Alexander Stepantsov. Koreografiaren zuzendaria: Vladimir Shmagun. Orkestraren zuzendaria: Lupanov Valery. Tokia: Kursaal Auditorioa. Data: Abenduaren 21a.

Ez da ohiko ikuskizuna gaur komentatu behar dudana. Zailtasunak dauzkat klasifikatzeko ere: musika folklorikoa da, baina oso markatua Sobietar Errepublika Sozialisten Batasuneko garai bateko estetikaz. Artistek formakuntza klasikoa dute, begi bistan dago, baina ikusgarritasunaren bila dabiltza eta, horren mesedetan, “oropel” moduko apaingarri exajeratu eta modaz pasatakoak erabiltzen dituzte. Halere, nire kritika ez da txarra. Ikusi eta entzun egin behar da Kieveko Armadako Abesbatza, Balleta eta Orkestra, ikasteko.

Abesbatza eta dantza talde hauen jatorria Bigarren Munduko Gerran aurkitzen dugu, talde hauek frontean eta ospitaleetan zeuden gudariei eramaten baitzizkieten beren aberriko kantak. Guda amaitu ostean beste herrialde batzuetako folkloreetako abestiekin aberastu zuten errepertorioa eta munduan zehar birak egin zituzten, oso arrakastatsuak.

Gaur egun, beren herrien pobreziaren ispilua dira, eta garai bateko kultura oparoaren dekadentziaren irudia bihurtu dira, baina ezin da espektakulu hau mespretxatu, inola ere. Ahots ikaragarriak entzun genituen, eta ziur musikari onak direla orkestrako kideak, baina megafonia erabiliz guztiz distortsionatzen dute emaitza. Instrumentu elektronikoak, bateria… horrek guztiak izorratu egiten du nolabait ikuskizuna, eta pent da. Dantza numeroak oso efektistak eta ondo eginak dira. Eta, horrez gain, folklore ukrainar eta errusiarra zoragarria da: “Anna”, “Begi beltzak”, “Kalinka” edo “Katyusha” bezalako kantak mundu osoaren patrimonioa dira, eta behin eta berriro entzutea gustatzen zaigu.

Kalitatearen “kotoiaren froga” bukaeran iritsi zen. Abesbatzak, a capella, Agur Jaunak ezin zainduagoa abestu zuen. Koruaren doitasuna, konpaktazioa eta gustua agerian geratu ziren. Gutxitan entzun dut hain polita, benetan. Txundituta geratu ginen.