Pasioz eta alaitasunez

Atalak: musika kritika

Fitxa: Euskadiko Orkestra Sinfonikoa. Zuzendaria: Jun Märkl. Bakarlaria: Johannes Moser (txeloa). Egitaraua: Saint-Saëns eta Bartok-en lanak. Lekua: Bilboko Euskalduna Jauregia. Data: azaroaren 8a.

Kontzertu batera goazenean, gauza asko baloratzen ditugu. Horien artean agian lehena kalitatea izango da (ikuspuntu tekniko zein artistiko batetik). Baina pare-parean edo momentu batzuetan goiko maila batean estimatzen dugu giro ona, alaitasuna transmititzea. Publikoak sentitu behar du musikariek gozatu egiten dutela jotzen dutenarekin. Eta horixe bera nabaritu genuen joan den larunbatean Euskadiko Orkestra Sinfonikoak eskainitako abonu-zikloaren hirugarren saioan.

Hain gustagarria den egitarauak eragin handia izan zuen, noski, halako efektu positiboa emateko. Camille Saint-Saënsen musika melodiatsu eta imajinatiboak primeran probokatzen du endorfinen jarioa. Egile honen ‘Sanson eta Dalila’ operako ‘Bakanal’ izeneko pasartea sendo eta alai iritsi zitzaigun. Jarraian, hain ezaguna den ‘Dantza makabroa’ izeneko poema sinfonikoak behar bezalako puntxa eta aldi berean gozotasuna izan zituen (batez ere sokan, benetan pulitua) Euskadiko Orkestraren bertsioan. Saioaren lehenego zatia amaitzeko, konpositore frantsesaren ‘Biolontxelo eta orkestrarako 1. kontzertua, op. 33’ obrak, fantasiazko bezain ederrak, lehen mailako protagonista izan zuen: Johannes Moser txelo jolea, oso adierazkorra, perfektua teknikoki baina batez ere arduratsua soinu eta fraseaketarekin. Bachen partita baten zati bat oparitu zuen bis gisa, jasotako txalokadari erantzunez. Primeran.

Eta lehenengo zatia ona izan bazen, bigarrena maila berean mantendu zen. Bartok-en ‘Orkestrarako kontzertua’, XX. mendeko orkestrarako lan ederrenetako bat, zentzuduna eta orekatua entzun genuen, Jun Märkl zuzendariaren eskutik. Oso atsegina.