Etsipen txiki bat

Atalak: musika kritika

Fitxa: Musika Hamabostaldia. Usandizagaren ‘Mendi-Mendiyan’. Euskadiko Orkestra Sinfonikoa. Zuzendaria: Antoni Ros Marbá. Easo Abesbatza. Zuzendaria: Xalba Rallo. Bakarlariak: Arantza Ezenarro, Miguel Borrallo, Olatz Saitua, José Manuel Díaz, Fernando Latorre eta Jesús García Aréjula. Lekua: Kursaal Auditorioa. Data: abuztuaren 22a.

Edo handia. Kasu honetan hobe eufemismorik ez erabiltzea. Hain gutxitan entzun den Usandizagaren ‘Mendi-Mendiyan’ pastoral lirikoaren berreskuratzeak, Musika Hamabostaldian, ikusmin handia sortu zuen. Ideia ona zen, kontuan hartuta aurten Usandizagaren heriotzaren mendeurrena ospatzen dela eta holako omenaldi bat merezi duela. Baina ospakizun hau ez da oso distiratsua suertatu. Orain dela hilabete batzuk disfrutatu genuen konpositore honen ‘La Llama’ operaren berrestreinaldia Euskadiko Orkestraren eskutik, eta zapore ona utzi zigun kontzertu horrek. ‘Mendi-Mendiyan’ek, ez hain gozoa.

Partitura honetan sentitzen dira musikariaren talentua, bere harmonia fina eta ondo trabatua. Halere, ez du lehen aipatutako ‘La Llama’ edo ‘Las golondrinas’ obren edertasuna. Bestalde, argumentua, artzain talde baten inbidia eta jelosietan oinarrituta, agia sinpleegia da edo ‘folky’-egia, pretentsiorik gabea.

Interpretazio justua izan zuen opera honek. Arantza Ezenarrok bete zuen bere papera duintasunez. Olatz Saituak eraginkortasunez egin zuen ‘Txiki’-ren rola, eta Miguel Borrallori adorea falta izan zitzaion Joshe Mariren paper dramatikoa egiteko. Fernando Latorrek eta Jesús García Aréjulak interpretazio balekoak egin zituzten, eta José Manuel Díazek, Juan Cruz-en rolean, ez zuen batere konbentzitu, arazo bokalak izan baitzituen.

Kontzertuaren onena, dudarik gabe, Easo Abesbatza, sendo eta oso afinatua, eta Euskadiko Orkestra Sinfonikoaren azpimarratze diskretua.