Luxuzkoa

Atalak: musika kritika

Fitxa: Gasteizko Kontzertu Handien Zikloa. Suediako Irratiko Orkestra Sinfonikoa. Zuzendaria: Daniel Harding. Bakarlaria: Maria Joao Pires (pianoa). Egitaraua: Chopin eta Dvorák-en obrak. Lekua: Gasteizko Principal Antzokia. Data: apirilaren 20a.

Kontzertu Handien Zikloko esku-liburuan kontzertu hau ‘hitzordu sinfoniko handi’ bezala aurkezten da, eta arrazoi osoarekin. Benetan saio ona suertatu zen hasieratik bukaeraraino, bikaina. Suediako Irratiko Orkestra Sinfonikoak nortasun berezia du, Daniel Harding bere zuzendari titularrak talentu aparta du, eta egun honetako bakarlaria, Maria Joao Pires piano jole portugaldarra, gero eta doi, fin eta adimentsuagoa agertzen zaigu. Ez zen egon aitzakiarik, ba.

Beti esan ohi da Chopin-en piano eta orkestrarako kontzertuak ederrak direla, bai, baina orkestrazioaren aldetik zertxobait sinple edo arruntak. Bai eta ez. Alde batetik, egia da bakarlarientzako musika oparo eta distiratsuaren ondoan, partitura orkestrala zurbila dela. Baina, bestetik, halaxe izan behar du Chopin-en maisutasunezko pianismoa azpimarraturik gelditzeko. Hau da, soiltasun orkestral hori konpositorearen aukera da, eta ez gaitasun-eza. ‘Pianorako 2. Kontzertua, fa minorrean, op. 18’ lan zoragarria goxotasunez jo zuen Pires andreak, baina manierismoan erori gabe, beti tentsiodun eta taxuz. Arnas hartze egokiak eta pedalizazio bikaina eginez. Baina Suediako Orkestrak paper handia izan zuen entzun genuen perfekzioan. Doi-doi aritu zen orkestra, bakarlaria azpimarratuz, berarekin elkarrizketa zoragarriak eginez. Primeran.

Lehenengo zaitan seduzitu gintuen Daniel Harding zuzendariak Chopin honekin, baina bigarren zatiko Dorák-en ‘Mundu Berriaren Sinfonia’ handiarekin maitemindu egin ginen. Soka ezin gozoagoa, metal eta egur primerakoak, tempi egokiak… Largo famatua hunkigarria entzun genuen, baina ez eztitsua, oso orekatua. Txalokada izugarria jaso zuten, ondo merezia.