Bi soinu-munduren integrazioa

Atalak: musika kritika

Fitxa: Gasteizko Kontzertu Handien Zikloa. Alfonso Gómez (pianoa), Ensemble Cairn. Zuzendaria: Guillaume Bourgogne. Egitaraua: ’24 préludes op. 28’, Chopin; ‘Préludes (Shapes)’, Ramón Lazkano. Lekua: Gasteizko Principal Antzokia. Data: apirilaren 23a.

Gasteizko Kontzertu Handien Zikloak klasikoaren eta garaikidearen arteko fusio interesgarria ekarri zigun apirilean, ikusleen arreta benetan erakarri zuena.

Frédéric Chopin-en ‘Préludes op. 28’ obra, zinez enigmatikoak eta magnetikoak diren 24 piezaz osatuta dago, J. S. Bach-en ‘Klabe ondo tenplatua’-ren preludio eta fugetan oinarrituak. Oraingoan, pieza horiek zortzi instrumentuentzako piezak eraikitzeko oinarritzat hartu dira, benetan Chopin-en usaina dutenak, baina iradokizun berri eta osagarrien mundu batean sartzen gaituztenak.

Ensemble Cairn taldea izan zen, hain zuzen ere, Ramon Lazkano-ri ehun chopiniarra berregiteko eta ikuspegi garaikide hori emateko lana enkargatu ziona. Lan benetan zaila da, konpositore erromantikoaren arima ez traizionatzea baita helburua, baina bai hizkuntza moderno, iradokizunez beteriko eta gordinago batera eramatea.

Principal Antzokian gozatu ahal izan genuen azken emaitza elkarrizketa moduko bat izan zen, non Alfonso Gomez pianistak interpretatutako Chopin-en preludio bakoitzari Ramon Lazkanok konposatutako eta Ensemblek interpretatutako beste preludio batek erantzuten zion. Chopin eta Lazkanoren obrei aurre egiteak, antagonikoak baina elkarrekiko indarrarekin, unibertso aldatu, heterogeneo eta aberatsa sortzen du, iraganaren eta orainaren artean mugitzen dena.

Interpretazioari dagokionez, Alfonso Gomez-ek preludio chopiniarren bertsio argi eta errebuskamendurik gabea egin zuen, adierazkortasun justuarekin. Teknika ona erakutsi zuen, nahiz eta zenbait deabruzko pasartetan exekuzio-garbitasun pixka bat falta izan.

Egia esan, Chopin-en interpretazioa beste gehigarririk gabe baloratuko bagenu, esango nuke bertsio hotz samarra izan zela, ñabardura gutxikoa eta intentsitate gutxikoa. Baina obra ez zen Chopin-era mugatzen, hauxe zen osagai nagusia eta oinarria, baina osotasun ezberdin eta neurri batean izoztu batean integratu behar zen, eta, horregatik, Gomez-en irakurketa eraginkorra izan zela esan dezakegu.

Ensemble Cairn talde frantziarrak bikain interpretatu zuen Ramon Lazkano-ren obra, ñabardura eta gutizi tinbrikoz betea, eta pianoarekin maisuki uztartu zuen bere lana.