Berriro ere gure jaialdia

Atalak: musika kritika

Fitxa: Tolosako Abesbatza Lehiaketa. Lekua: Tolosako Leidor Antzokia. Datak: urriaren 28tik azaroaren 1era.

Pandemia garaian ‘stand by’ egoeran geratutako melomanoentzako ezinbesteko beste ekitaldi bat izan dugu: gure Tolosako Abesbatza Lehiaketa da, 53. edizio honetan publikoaren ilusioa eta nazioarteko partaidetza maila onean berreskuratu zituena.

Zorionez, bidaiatzeko askatasunari esker, jatorri desberdineko 17 talde Leidor antzokian aritu ziren guztion gozamenerako. 6 taldek parte hartu zuten haurren modalitatean, eta 11k ganbera taldeen modalitatean. Eta, esan dudan bezala, hainbat herrialdetatik etorriak: Estatu osotik taldeez gain, Estonia, Letonia, Polonia, Suedia, Txekia, Eslovenia, Estatu Batuak, Irlanda, Mexiko eta Ukraina ordezkatuta egon ziren. Era berean, ohi bezala, nazioarteko epaimahai zorrotza izan genuen, Xabier Sarasola beasaindarra buru zuena.

Parte hartu zuten taldeen maila ona izan zen, eta bertaratutakoek gozatu genuen, zalantzarik gabe. Baina, egiaren ohorez, esan beharra dago kalitate-desberdintasunak nabariak izan zirela, eta irabazle argi batekin: ukrainar abesbatza.

Hori erabat frogatuta geratu zen irabazleen palmaresean. Kieveko Sofia Chamber Choir abesbatzak sari guztiak irabazi zituen. Lehenengo eta behin, publikoaren saria eraman zuen, baita Polifonia modalitateko eta Folklore modalitateko lehen sariak ere. Eta, jakina, Kutxa Sari Nagusia irabazi zuen, Debrecenen (Hungaria) egingo den 2023ko Abesbatza Kantuko Europako Sari Nagusirako izendapena dakarrena.

Eta, inork ez dezala pentsa sari zaparrada hori Ukrainako egungo egoeraren ondorio izan zenik. Ezta pentsatu ere. Koruaren kalitatea harrigarria izan zen. Bere interpretazioetako bat aipatzearren, Josu Elberdinen ‘Ave Maria gratia plena’ (aurten Polifonia modalitatean derrigorrezko obra) lanaren bertsioa azpimarratu behar dut, bikaina izan zena. Enpaste perfektua, ahotsen harmonizazio ederra eta zuzendariaren gidaritza perfektua izan ziren talde bikain honen ezaugarriak.

Beste talde batzuentzako sariak izan ziren, noski. Haurren modalitateko lehen saria Letoniako Riga Cathedral Girls’ Choir Tiara taldeak irabazi zuen.

Bestalde, Eusko Jaurlaritzak euskal lan baten interpretazio onenaren saria Letoniako Ellerhein Girls’ Choir abesbatzarentzat izan zen, Junkal Gerreroren ‘Errota’ lanaren interpretazio polita egin baitzuen, koreografia eta guzti.

Eta pertsonalki, palmaresean agertzen diren abesbatzetako bat aipatu behar dut, bereziki bikaina iruditu zitzaidana. Estatu Batuetako Brigham Young University Singers da. Pollfonia modalitatean hirugarren postua lortu zuen eta Folklore modalitatean bigarren postua. Freskotasun berezia erakutsi zuten, eta ahots onak, oso ondo zuzenduak.

Azken finean, edizio polita. Datorren urtean, gehiago eta hobeto