Suhartasun hutsa

Atalak: musika kritika

Fitxa: Musika Hamabostaldia. Deutsche Kammerphilharmonie Bremen. Zuzendaria: Omer Meir Wellber. Andra Mari Abesbatza. Zuzendaria: Andoni Sierra. Bakarlariak: Heidi Stober (sopranoa), Rachel Frenkel (mezzoa), Martin Mitterrutzner (tenorea), Stefan Cerny (baxua). Egitaraua: Beethoven eta Haydnen lanak. Lekua: Kursaal Auditorioa. Data: irailaren 1a.

Bigarren aldiz gozatu ahal izan genuen Deutsche Kammerphiharmonie Bremen-ez, oraingo honetan Musika Hamabostaldiaren itxiera ekitaldian. Eta lehen topaketa oso goraipatua izan bazen, bigarren aldi honetan argiago ikusi ahal izan genituen talde honen kualitateak.

Orkestra soinu eta testuren gozamena da. Benetan, bere ospea merezi duen talde handi bat. Baina, agian, zuzendariaren intentsitateak eman zigun arreta gehien. Omer Meir Wellber, programa osatu zuten bi obren interpretazioan egin zuen diseinu kementsu eta sutsuagatik nabarmendu zen.

Beethovenen “1. Sinfonia” berritua iruditu zitzaigun, hasierako mugimenduko Allegro con brio-ari ekiteko erabili zuen indarrari esker. Animazio erritmikoaren, kontraste nabarmenen eta testuren arintasunaren konbinazio zoragarriagatik, korronte historizistatik tradizio erromantikotik baino askoz hurbilago zegoen interpretazioa izan zen. Bertsio-harribitxi bat, amaiera harmonia-eztanda bat izan zuena.

Eta entzuleen harridura nagusia saioaren bigarren zatian jo zuten lana izan zen: ‘Missa Nelson Hob. XXII, Haydnena. Edertasun handiko meza da, baina ez da behar bezainbeste programatzen.

Horregatik, publikoa txundituta geratu zen, Bremenekoek eskaini ziguten bertsioaren kalitatea ere kontuan hartuta. Omer Meir Wellberrek pianofortetik zuzendu zuen orkestra, oso modu ausartean. Batzuetan, modu ausartegian ere bai. Egia da, batzuetan oldarra gehiegizkoa zen. Baina egia da, halaber, Meir Wellberren nortasun horrek originaltasun puntu bat ematen duela, eskertzen dena. Zuzendari honen estiloa ez da maiz igarotako bideetan ibiltzea. Garbi geratu zen.

Baina ez dugu orkestraz bakarrik hitz egin behar. Andra Mari Abesbatzak ñabardura harrigarriak eta konpaktazio bikaina erakutsi zituen.

Eta lau bakarlarien lana bi taldeen mailan egon zen. Hala ere, azpimarratzekoa da Heide Stober sopranoaren ahots bikaina eta tinbre ederra.

Amaiera ona oso edizio dotore baterako.