Tosca-k liluratu egin zuen

Atalak: musika kritika

Fitxa: Musika Hamabostaldia. Puccini-ren ‘Tosca’. Euskadiko Orkestra Sinfonikoa. Zuzendaria: Miguel Ángel Gómez Martínez. Easo Abesbatza eta Easo Eskolania. Zuzendaria: Xalba Rallo. Bakarlariak: Ainhoa Arteta, Teodor Ilincai eta Roberto Frontali. Eszena Zuzendaria: Pako Azorin. Lekua: Kursaal Auditorioa. Data: abuztuaren 15a.

Egia esan, ez dakit nork utzi zuen publikoa txundituta, Tosca pertsonaiak ala Ainhoa Artetak. Puccini-ren Tosca publikoak gehien maite duen opera horietako bat da. Eta ez bakarrik musika ezagunarengatik (batez ere aria batzuk), baizik eta suspentsea duen argumentuarengatik eta dudarik gabe daukan zinemako kutsuarengatik, bai akzioan bai diskurtso musikalean. Azken batean, operazalea izan edo ez izan, Tosca oso gustagarria da.

Aldi honetan arrazoi gehiagorengatik. Ainhoa Arteta tolosarra protagonista izatea bazen eragingarri nahikoa Kursaal auditoriora bertaratzeko, baina ikusi eta entzun ondoren esan dezakegu Arteta Floria Tosca perfektua dela. Ezingo genuke imajinatu abeslari hoberik paper honetan. Urteak joan ahala gero eta ahots menderatuagoa du Artetak, malgua eta distiratsua. Horrez gain presentzia ikaragarria du eszenatokian eta pertsonaiari adore eta pasio berezia eman zion. ‘Vissi d’arte’ aria famatua biribildu egin zuen (saio osoaren ia-ia momento onena izan zen).

Artetaren ondoan, azpimarragarria izan zen Roberto Frontali baritonoaren aktuazioa, Scarpia gaizto-gaiztoaren rolean, oso konbentzigarria. Agian flojotxoago egon zen Teodor Ilincai tenore errumaniarra, baina asko gustatu zitzaidan. Oso gaztea da Ilincai, eta ziur nago zeresan handia emango duela denborarekin. Ahots argi eta boteretsua du abeslariak, eta luzimendu osoz abestu zuen ‘E lucevan le stelle’ aria sentitua. Bikain.

Pako Azorin eszena-zuzendariari buruz bakarrik gauza onak esan ditzakegu. Oso lan ona egin du opera honekin. Nahasketarik gabe, eszenografia garbia eraiki zuen eta abeslariak primeran zuzendu egin zituen taula gainean.

Easo Abesbatza eta Easo Eskolania, puntu-puntuan, eta azpimarratu nahiko nuke Euskadiko Orkestra Sinfonikoaren aktuazioa, Miguel Ángel Gómez Martínez batutapean, benetan lan aparta egin zutelako, ahotsak fintasunez azpimarratuz eta bolumen orekatuak lortuz uneoro. Gozada bat.