Pasioz gainezka

Atalak: musika kritika

Fitxa: Euskadiko Orkestra Sinfonikoa. Zuzendaria: Ari Rasilainen. Egitaraua: Vaughan Williams, Xostakovitx, Otaolea eta Elgar-en obrak. Lekua: Gasteizko Principal Antzokia. Data: azaroaren 7a.

Interesgarria, koloretsua eta punttu esoteriko batez hornituta agertu zitzaigun Euskadiko Orkestraren denboraldiaren bigarren saioa. Baina, guzti horren gainetik, gehien destakatu zuena Enrico Dindo txelo jolearen aktuazioa izan zen. Dimitri Xostakovitx-en ‘Biolontxelo eta orkestrarako 1. Kontzertua, mi bemol maiorrean, op. 107’ obra miresgarriak ere parte izan zuen mirari horretan, baina Dindo-ren musikalitateak eta komunikatzeko gaitasun apartak publikoa zur eta lur utzi zuten. Soinu oparoa du bakarlari italiarrak, eta fraseaketa libre eta malgua, gozamen bat, benetan. Ari Rasilainen zuzendariak, berriz, jakin zuen jolearen interpretazioa azpimarratzen, bakarlariaren eta orkestraren arteko oreka ederrak lortuz. Propina gisa, Bach bat oparitu zuen Dindo-k. Pasionatua baita ere.

Halere, esan bezala, gainontzeko obrek bere xarma izan zuten. Vaughan Williams-en ‘Thomas Tallis-en gai baten gaineko fantasia’, sokazko orkestrarako, konpositorearen lan ezagunenetako bat da, eta Rasilainen-ek lan honen bertsio dotore eta garbia egin zuen. Bigarren zatian, erabateko estreinaldi bat entzuteko aukera izan genuen. Xabier Otaolea gaztearen ‘Agartha’ obra laburra, lurraren barruan omen dagoen hiri mitiko horren ideiarekin egina, izpiritualtasunez beteriko orria izan zen, ondo eraikia. Edward Elgar-en ‘In the south’ izeneko obrarekin amaitu zen saioa. Konpositoreak Italian hartutako inpresioekin burututako lan hau berotasunez baina gehiegikeriarik gabe jo zuten Euskadiko Orkestrakoek.