Sorta bitxia

Atalak: musika kritika

Fitxa: Euskadiko Orkestra Sinfonikoa. Zuzendaria: Jun Märkl. Bakarlaria: Tadashi Tajima (shakuhachi). Egitaraua: Frank Martin, Toshio Hosokawa eta Brahms-en lanak. Lekua: Gasteizko Principal Antzokia. Data: maiatzaren 11a.
Hiru obraz osatu zen Euskadiko Orkestrak Gasteizen maiatzaren 11n emandako saioaren egitaraua. Obra oso desberdinak haien artean, eta oso interesgarriak. Nortasun handikoak esango nuke. Lan bakoitzak, bere garaian, originaltasun puntu bat eskaini zuen.
Frank Martin konpositore suitzarraren ‘Concerto for seven winds’ obrak, egitura neoklasikoa mantenduz, badu ezaugarri berezi bat: bakarlari bakarra izan ordez, zazpi haizezko soinu tresnak dira protagonistak (oboea, klarinetea, tronpa, tronpeta, tronboia, fagota eta flauta). Oso lan efektuduna da, non hirugarren mugimenduaren interpretazioa azpimarratuko nuke, bizia eta nerbioduna, Jun Märkl-en batuta doiari esker.
Halere, saioaren izarra Tadasha Tajima, shakuhachi (japoniar flauta tradizionala) jolea izan zen. Oso exotikoa eta berezia. Bost zulo ditu flauta honek, eta eskala pentatonikoan afinatuta daude, semitonorik gabe, baina interpreteak modulatu ditzake soinu guztiak, efektu iradokitzaileak lortuz. Aldi honetan, Toshio Hosokawa konpositorearen ‘Autum wind’ shakuhachi eta orkestrarako lana jo zuten, oso enpastatuak, giro mistikoa lortuz.
Saioa amaitzeko, Brahms-en ‘4. Sinfonia mi minorrean, op. 98’ jo zuten. Agian Brahms-en aurreko hiru sinfoniek badute asaldura erromantiko gehiago, baina, dudarik gabe, hau nire faboritoa da. Bach eta Beethoven-en eragina nabaria da, batez ere laugarren mugimenduan, baina Brahms-en nortasuna eta dotorezia nonahi aurkitzen ditugu lan eder honetan. Euskadiko Orkestrak jakin izan zuen mugimendu bakoitzaren izaera azpimarratzen, maisuki. Asko disfrutatu genuen interpretazioarekin.