Gala gustagarria

Atalak: musika kritika

Fitxa: OLBE-k antolatutako ‘OLBE on stage’ gala. Bakarlariak: Carmen Solís, Itziar de Unda, Silvia Tro Santafé, Celso Albelo, Sergio Escobar, Moisés Marín, Juan Jesús Rodríguez eta Simón Orfila. Bilbao Sinfonietta Orkestra. Zuzendaria: Óliver Díaz. Egitaraua: Saint-Saëns, Bellini, Bizet, Verdi, Donizetti, Guerrero, Lecuona, Serrano, Sorozabal eta Fernández Caballero-ren lanak. Lekua: Euskalduna jauregia. Data: apirilaren 24a.

Egia esan, denbora asko igaro da orain komentatu nahi dudan gala zoragarri honetatik. Agian denbora gehiegi igaro da, baina inoiz ez da berandu lan bikain bat nabarmentzeko eta Euskaldunan artista  zoragarri hauek entzuteko aukera izan genuen guztien gozamena kontatzeko.

Behin baino gehiagotan goraipatu dut OLBE-k urte luze honetan opera gustuko duten ikusleen interesari eusteko izan duen trebetasuna, ohiko antzezlanak ezin izan baitira ospatu. ‘OLBE on stage ‘izenburupean, errezitaldi sorta bat programatu dute, eta protagonistak nazioarteko bakarlari onenetakoak izan dira.

Oraingoan, gala eder bat izan zen, non izar ezagunek egitarau bariatua interpretatu zuten. Frantziako errepertorioa, italiarra eta zarzuela dosi on bat jaso genuen bertan.

Hasteko, Carmen Solís eta Silvia Tro Santafé (belusezko ahotsak, garbiak) uztarketa zehatzarekin abestu zuten Bellini-ren  ‘Norma’ operaren “Mira o Norma…”.

Jarraian, Celso Albelok tenore lirikoaren bere alderdirik onena erakutsi zuen Bizet-en ‘Perla-arrantzaleak’ operaren “Je crois entendre encore” arian. Benetan zaila da aria hau, baina Albelok ez zuen huts egin, guztiz kontrakoa, entzulegoa poltsikoan sartu zuen bere ahots indartsu eta dotoreari esker.

Verdi-ren errepertorioan, Simon Orfila, Sergio Escobar eta Juan Jesús Rodríguez oso ondo egon ziren, bakoitza bere erregistroan.

Oso aipagarria izan zen Itziar de Unda eta Moises Marin-en interpretazioa Donizetti-ren ‘L’elisir d’amore’ operaren “Caro elisir! Sei mio” duoan, non ahots onez gain, freskotasuna eta grazia erakutsi zituzten.

Zarzuelari eskainitako zatian, bakarlari guztiek izan zuten luzimendurako aukera. Carmen Solís oso adierazkorra egon zen Ernesto Lecuonaren ‘Romanza de María de la O’ lanean, eta Celso Albelorekin batera interpretatutako ‘Comprende lo grave de mi situación’ duo distiratsuan, benetan txunditu zuten publikoa.

Juan Jesús Rodríguez-ek eta Silvia Tro Santafé-k pozez bete gintuzten Sorozabal-en ‘Hace tiempo que vengo al taller’ –konpositore donostiarraren harribitxi bat- duoarekin. Eta Sergio Escobar-ek bere indarra eta ahotsaren nagusitasuna erakutsi zuen konpositore beraren ‘No puede ser’ abestian.

Biribila benetan.