ARGIAren zuzendaritza osaketa: Hauteskundeetarako lehen itzulia

argia
0

[Itsaso Zubiria Etxeberria] Batzuk datorren udaberrirako aurreikusita dauden hauteskundeetarako kanpainan sartuta daude dagoeneko, zuzenean kanpaina egin edo zeharka. Baina denak topera. Zerrendak egin, hautagaiak aurkeztu, inkestak begiratu… Beste batzuk, berriz, kanpaina gehiegirik gabe deitu eta egin dituzte hauteskundeak.

Zuzendaritza berria aukeratzeko hauteskundeak egin dira lehen aldiz etxe honetan. Ez ehun urteotan zuzendaritza bakarra egon delako, noski; baina orain arte momentuko zuzendaritza joan da bere ustez egokia zen pertsona taldean sartu eta taldea berritzen. Ez zegoen epe-mugarik zehaztuta, eta ia pertsonak krak egin arte jarraitzen zuen zuzendaritzan tiraka, gorputzak aguantatu arte. Hemendik aurrera, ordea, joko-arauak desberdinak izango dira.

Ez da gauetik egunera erabakitako zerbait izan, imajinatuko duzu, irakurle; orain oso modan dauden parte hartze prozesu horietako bat egin da. Hasteko, definitu dira zuzendaritzaren funtzioak. Horren arabera zuzendaritzako kide kopurua. Bost izango dira denera eta momentuak eskatzen badu handituko da zifra hori. Baldintza da ARGIA osatzen duten idazkaritza, erredakzio eta salmenta sekzioak ordezkatuta egotea, eta zuzendaritzako parte izateko enpresako bazkide izan beharra dago. Errotazio sistema baten bidez pixkanaka sekzio bakoitzeko kide guztiak momenturen batean zuzendaritzan egotea da asmoa, eta bost urterako hartuko da kargua. Hauteskundeak, baina, ez dira bost urtean behin izango, urtero baizik; errotazio-sistemaren bidez zuzendaritza urtero joango baita kideren bat aldatzen (beti ere sekzio guztietako jendea zuzendaritzan ordezkatuta dagoela bermatuz). Egin berri diren “hauteskundeetan” hautatutako bi kideak datorren urtarrilean sartuko dira zuzendaritzan, eta bi kidek utziko diote ardura horri.

Aldaketa honek eskatzen du zuzendaritzako ardurak lanaldiaren barruan eramateko modukoak izatea, ez gainkarga handiegia izatea, bestela, bizitzako egoeraren arabera, langile denek ezingo bailukete zuzendaritza osatu. Azken urteetan lantaldeen bidez egin da lehen zuzendaritzakoak ziren ardura eta erabakien banaketa, horizontaltzea.

Zer lortuko da lan-taldeko kide gehienak edo denak zuzendaritzatik pasatuta? Ekipo formatu eta sendoago bat, enpresa horizontalago bat, ikuspegi zabalagoa… Hori behintzat gure esku dago.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

ARGIAko Blogarien Komunitatea - CC-BY-SA