Kulturgintzako greba digitalarekin bat egiten du ARGIAk eta Multimedia kanala itxiko du apirilaren 21ean eta 22an

argia
0

Kulturgintzako langileek apirilaren 21 eta 22rako deitu duten greba digitalarekin bat eginez, ARGIAk ez du sormen lanik partekatuko bi egun hauetan bere sareen bitartez eta horretaz gain, webguneko Multimedia kanala itxita edukiko dugu.

Ehunka euskal sortzaileren lanak eskaintzen ari gara ARGIAren kanal horretan duela hamar urtetik, tartean dokumentalak, film laburrak, antzezlanak eta mota askotako ekitaldiak. Hori itxiz ireki nahi dizkiogu ate berriak euskal kulturgintzari; isilduz entzunarazi, desagertuz ikusarazi, greba digitala deitu dutenek erabili dituzten hitzak geure eginez.

Gurean ikus daitezkeen ikus-entzunezkoen egileek libre eta doan eskaini dizkigute euren lanak denbora honetan guztian, euskal kultura ahalik eta jende gehienarengana iristeko borondateagatik. Azken aste hauetan, gainera, etxealdia guztiontzat bizigarriagoa izan dadin, kulturgile askok hainbat ekimen antolatu dituzte, den-denak musu-truk. Orain berriz, urtetan hainbeste eman diguten sortzaile horiek, bizi duten egoera larriaz ohartarazi dute: COVID-19aren krisia hasi denetik programazio kulturalak bertan behera geratu dira eta beraz, lan artistiko edo kreatiboak egiten dituzten pertsona asko egun batetik bestera inolako diru-sarrerarik gabe geratu dira. Lehen prekarioa zen sektorea hil ala biziko egoeran dago, ehunka pertsonaren lanpostuak daude jokoan, eta haiekin batera euskal kulturgintzaren etorkizuna bera ere bai.

ARGIAn ere kezkaz bizi dugu egoera hori, hedabide hau betidanik egon baita euskal kulturgintzari lotua. Hori dela-eta, greba deitu duten sortzaileekin batera, Euskal Herriko instituzio publikoei eskatzen diegu une konkretu honi erantzuten dioten urgentziazko neurriak hartzeaz gain, ikuspegi estrategikoz joka dezatela. Euskal kultura gizartearen oinarrizko beharrizanetako bat dela ulertzen dugu, herritarren ongizatearen funtsezko osagaia dela eta, bakartuta gauden honetan, gure herri izaera kolektiboki bizitzeko ezinbesteko bitartekoa.

Greba digitala deitzeko manifestua eta atxikimenduak, Kulturgintzan.eus webgunean aurkituko dituzue.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

ARGIAko Blogarien Komunitatea - CC-BY-SA