Teoriak dio politikariak herritarron interesen alde egiteko aukeratuak izaten direla, baina errealitateak dio gure zerbitzura baino gure lepotik ondo baino hobeto bizi direla. Politikariaren eta herritarren batazbesteko diru-sarreren artean arrakala handia egotea onargarria al da sistema demokratikoetan?
Barakaldoko alkateak dio haserre, ezetz, berak ez dituela 93.000 euro kobratzen. Berriotxoak taldeak salatzen duen hori gehiegikeria litzateke, antza. Berak “71.000 euro soilik” jasotzen dituela dio naturaltasun osoz. 4.000 hilean 14 pagatan, alegia. 15.000 langabetuen alkatea da Alfonso García, 2013an astean 4 familia (202 orotara) etxerik gabe geratu ziren herrian. Umorez kontatu behar dugu hain ezaguna zaigun egoera hau. Herritarren egoera makurra ez baita oztopo edo arrazoi politikarien soldataren tamaina erabakitzeko. “Politikaria = ardura handia = zurebizitzaosoanlanegindainoizbildukoezduzunbezalakosoldatatzarra” ekuazioa barneratuta dugula dirudi. Eta, tamalez, politikagintza profesionalaren DNAan txertatuta dagoela ematen du.
Lanbidea (barka oximorona) izateaz gain, politikagintza instituzionala negozio itzela delako etxean zein gure mugetatik kanpo ere bai. Soldapeko politikari izatea, finantzen mundu espekulatiboa eta arma, droga eta emakumeen salerosketarekin batera, kapitalismoak ahalbidetzen duen aberasbiderik eraginkorrenetakoa dela berresten du *Visualizing Impact (VI) kolektiboaren infografiak. ARGIA eta VIren arteko elkarlanaren azken emaitza da honakoa. Herritarrek gatazka armatua edo egoera ekonomiko larria sufritzea ez direla politikariaren lapurretak eteteko arrazoiak azpimarratu du lan honek.
Kenia buru agertzen zaigu: hango politikariek herritarrek baino 97 aldiz gehiago kobratzen baitute. Eta bigarren postua, beriziki aipagarria da: Al Fatah alderdiaren esku dagoen Palestinako Aginte Nazionala. Okupazioari (okupazio ekonomikoa barne) aurre egiteko sortu zen mugimenduan ere diruzalekeria agertzeak erakusten du politikagintza instituzionalaren ohiko egituraketa zenbateraino dagoen galdua.
Sei herrialde arabiarretako herritarren eta politikarien batezbesteko soldatak alderatu dituzte grafikoan. Eta emaitzari perspektiba orokorragoa emateko Europako, Afrikako eta Amerikako beste sei herrialderen egoerekin alderatu dituzte. Horrez gain, GINIren koefizientea erabiliz, diru-sarreren arteko ezberdintasunaren arabera sailkatuta daude herrialdeak. Politikarien gerri-bueltaren tamainak adierazten du herritarrak eta politikarien arteko egiazko arrakala ekonomikoa. GINI koefizientearen eragiketa ulertzea erraza ez bada ere, herri gehienetan politikariak kasta (onura bereziak dituen gizarte multzoa) direla ikustarazteko baliogarria da infografia.
*Visualizing Impact da Visualizing Palestine kolektiboaren sortzailea. Palestinarren egoerari buruzko inforgrafiak sortzen ditu talde horrek. Horietako lan batzuk euskaratu eta zabaldu ditugu blog honetan.
Infografia inprimatzeko moduan deskargatu: VI-Politician-Salaries-Basque.jpg
