Notiziak harridura eragin du Espainiako iritzi publikoan, baina behin sustoa pasata, kiroltasunez onartu du ia mundu guztiak Euskalduna naiz, eta zu? ikerketa- erreportajeak argitutako egia. “Bai, onartu behar dugu, 40 urte iraun zuen diktadura bat bizi izan dugu eta, ondorengo erregimenak ere, agian, gauzatxo batzuetan huts egin du: torturatxo batzuk, gerra zikintxo bat, ustelkeria pittin bat, inork bozkatu gabe eskubide sozialak pikutara bota dituzten agintariak, eta, behin hori eginda, haiei botoa ematen jarraitu duten milaka herritar… Ez dakit nola ez ginen konturatu gure bizilagunak pixka bat eskuinekoak zirela”, idatzi du El País egunkariko zutabe batean Juan Cruzcampo kazetariak. Estereotiporik ez sortzeko eskatu du, ordea: “Orain etarra harrijasotzaile tonto horien telebistak gauza horiek esan dituelako ez gara eroriko txokokerietan: denok gara espainiarrak eta, beraz, unibertsalak ez ezik, intergalaktikoak”.