21.000 ikaslek landu dute bertsolaritza Euskal Herri osoan
Ikasturte amaierako Legazpiko saioa. Argazkia: Goierriko Hitza.
Euskal Herri osoko 410 ikastetxetan aritu dira Bertsozale Elkartearen Gu ere Bertsotan proiektua lantzen 38 irakasle eta 21.000 ikasle. Azken asteotan ikasturteko lana erakusteko hainbat jaialdi eta topaketa egiten dabiltza. Herrialdeka, Gipuzkoan egitasmoak 10.000 haur eta gazte mugitzen ditu; Bizkaian 7.700 ikasle aritzen dira bertsolaritza lantzen; Araban 2.500; Xiberoa, Baxenabarre eta Lapurdin 800 eta Nafarroan 45 ikastetxe.
Bertso-eskoletan, 1.700 lagun
Bertsotarako grinari jarraipena eman diote 1.700 gazte eta helduk bertso-eskoletan. Asteotan Bertso Eskolen Egunak ari dira ospatzen, gehienak Eskolarteko Txapelketari loturik. 15-18 urte bitarteko 100dik gora gazte ari dira parte hartzen Eskolarteko Txapelketan eta Euskal Herriko finala ekainaren 27an jokatuko da, Orion.
Bertso-udalekuetarako garaiz zabiltza
18 urte daramatza Bertsozale Elkarteak udalekuak antolatzen. Aurten uztailean eta abuztuan egingo diren 5 txandatan 240 bat haurrek hartuko dute parte. Muxikako eta Orioko udalekuetan izena emateko aukera dago, ekainaren 4a bitarte. Aisialditik eta bertsolaritzatik abiatuta, Euskal Herriko hainbat txokotako lagunak egin eta tokian tokiko eragileak ezagutzeko aukera ederra dira udalekuok.
Zorionez azken urteotako bertso munduko barririk gehienak poztekoak dira. Emoten dau badagoala potentziala oraindino bere asko hazteko. Ze ederra dan lantzean behin kuadrillaren bat tabernan bertsotan ikustea, batez bere lehen tradizinorik ez egoan (edo behin honez gero galduta egoan) mendebaldeko herrixka batzutan.
Mila esker BF zure ekarpenagatik. Goiza edonori alaitzen dion ikuspegi positibo horrekin erabat ados, urrats bakoitzaz jabetzea ezinbestekoa da bizitzeko.