Kontu ilunak GHKn: Ezkutatutako informazioa eta hatzaz hautatutako lanpostuak

Atalak: Kontu ilunak GHKn

Ainhoa Intxaurrandietak iragan azaroaren 29an Zizurkilen eman zuen hitzaldian azaldu zituen GHKren lehendakari-orde zela sumatu zituzten irregulartasunak. Aurreko artikuluetan dituzu banaka azalduak desagertutako ordenagailuaren afera eta ordenagailu hartan aurkitutako dokumentuek argitara atera dituzten frogak. Beste kasu hauek ere aipatu zituen, GHKren kudeaketa ilunaren adierazgarri:

Batetik, langileek GHKko zuzendaritzari informazioa ezkutatu zietela: “2012ko apirilean GHKn txosten bat jaso zuten. Ordurako EH Bilduk zuen gehiengoa GHKn eta kudeatzaile berriak zeuden: Juan Karlos Alduntzin zen Aldundiko Ingurumen diputatua eta GHK-ko lehendakaria. Baina EH Bilduk ez zuen txosten horren berri izan. Eta txosten hori zen IBH ingeniaritza enpresak bidalitako email bat, esaten zuena: EH Bilduk hondakinen plangintza aurrera eramaten badu, eta esan duen herri guztietan atez-ateko bilketa jarri behar badu, Gipuzkoan 80.000 tonako errauste planta batekin nahikoa izango da. Eta txosten hori, GHK-ko buruzagitzan gu gaudela, ezkutatu egin zitzaigun”.

Bestetik, kontratazioak hatzaz hautatzen zirela kontatu zuen: “Kontratatzioetan ere gauzak gaizki egiten ziren: EAJ, PSE eta Hamaikabat-ek, alderdi politiko bakoitzak bi langile sartzen zituen. Hori frogatzen duten emailak baditugu ‘aizu, ez ahaztu bihar goizean bi izen ekartzea, administrari eta beste ez dakit zer postutarako’, eta ondoren izen horiek izan ziren postu horietarako hautatuak”. Teknikari bat kontratatzeko lehiaketa baten kasua ere azaldu zuen: “lehiaketa horretako azken azterketa egunean bertan kontratatu zuen GHK-k Gipuzkoaz kanpoko teknikari hautagai bakarrarentzako etxe bat, alokairuan. Baina egun batzuek lehenago jada aurrekontuetan sartua zuten 1.300 euroko gastua, eta ondoren 1.300 euroko alokairuko etxea hartu zioten pertsona horri. Azken azterketa egin aurretik bazekiten alokairua zenbat ordaindu behar zuten, bazekiten lehiaketa irabaziko zuena ez zela gipuzkoarra, eta gipuzkoarra ez zen bakarra, teknikari hori zen”.

Honaino Ainhoa Intxaurrandietak eta Josu Amilibiak Zizurkilen eman zuten hitzaldi mamitsutik berreskuratutako pasarteekin osatutako artikulu sorta. Agintari politikoek errausketaren gaian “arduraz jokatzen dutela” adierazten dutenean edo “konfiantza” izateko eskatzen digutenean, burura etorriko zaizkigu pasarte hauek.

Hurrengo hilabeteetan Intxaurrandietak aterako duen liburuan irakurri ahalko ditugu horrelako pasarte gehiago, xehetasun handiagoz azalduak.

Hau guztia 2013 inguruan. Eta egungo kudeaketaz zer?

2013 inguruko gertakizunak dira, baina egungo kudeaketan konfiantza handiagorik izaten ez du laguntzen, bai Intxaurrandietak eta bai Amilibiak azaldu zutenez, GHKren eguneroko martxa daraman GHK-SAUn oposizioko EH Bilduri parte hartzeko aukerarik utzi ez izanak. Amilibiak azaldu zuenez, “kontsortzio bakarra da oposizioko alderdiei parte hartzen uzten ez zaiena. Beti ematen zaie aukera, horrelako egituretan, adibidez uraren kontsortzioan, alderdi guztiei ordezkaritza izaten”. Horren ondorioz, erraustegi proiektuaren eguneroko erabaki eta kudeaketaz informaziorik jaso ezinik geratu direla salatu zuten.

“Kontu ilunak GHKn” artikulu sorta honetako aurreko aleak:

1.-Atarikoa

2.-Lapurtutako ordenagailuaren kasua eta swap-etatik libratzeko aukera

3.-Lapurtutako ordenagailuak baieztatzen du: erraustegia zen, ez “balorizazio energetikoko planta”

4.-Jaurlaritza ere saltsan