Hedabideen erritmora

Atalak: (C)politika

Igande honetan, apirilaren 22an, hurbilduko dira frantses hiritarrak boz ontzietara. Larunbatean, gogoeta eguna izaki, hautagaiek beren burua buru-belarri eskaini ostean, burua oheburuarekin batzeko premia izanen dute. Bihar, halaber, hautesle asko boza nori eman oheburuarekin kontsultatzekotan oheratuko dira nonbait.

Kanpaina hasieran hautesleen % 40 boza nori eman erabakitzeko zegoen. Erabaki gabekoen ehunekoa %40tik %20ra jaitsi da. Kanpainak eragin du antza, nahiz, eta inkestek diotenez, bozen intentzioa ere aldatuz joan den. Kontua da zein inkesta begiratzen den, guk seitan so egin dugu. Izan ere, inkesta kontuetan zenbat buru hainbat aburu, edo kasurako, nork egiten duen inkesta halako izaten da emaitza, ezta?

Emaitzen batez bestekoari kasu egin diogu hartara. Honelakoak dira emaitzak apirilaren 20an: Nicolas Sarkozyek %29, Ségolène Royalek % 25, François Bayrouk %15 eta Jean-Marie Le Penek %13.

Funtsean, emaitza hauek eta duela aste batekoak, puntu bat goiti-behiti, berdintsuak dira. Boza erabakitzeko falta diren %20k aldatuko ote dituzte aurreikuspenak?

Baliteke. Baina, tira, boz intentzioa azalduko dutenen artean izanen dira beren asmoa aldatuko dutenak, baita euren benetako boza ezkutatu dutena ere. Ez da gauza berria Le Penen aldeko boz emaile askok beren burua eta asmoa ezkutatzea.

Le Penen azken tiroek Sarkozy izan dute jomuga. Honen jatorria oroitarazi die hautesleei beste behin ere, hots, aita hungariarra zuela. Le Penek hori gogoratzeagatik ez dela arrazista dio, eta pertsonen jatorriak ez duela bere kargua mugatu behar, alabaina Errepublikako presidente kargua ez da gainerakoak bezalakoa, adierazi du eskuin muturreko hautagaiak.

Royalen begiek aldiz Bayrourengan jo dute: Bayrou, funtsean, eskuindarra dela azpimarratu du PSko hautagaiak. Bayrouk, berriz, dio ezkerrak ezin duela eskuina garaitu, eta bera dela boz baliagarria.

Sarkozyk ez dio Le Penen amuari kosk egiten, eta Bayrou-ren zentroko politika ez dela existitzen dio. Politika hori matematikoki hutsa edo zero dela. Royalek ere ikuspuntu hau onetsi du nolabait. Alegia, elkarren beharra dute Sarkozyk eta Royalek, bigarren itzulian elkarren aurkako partida jokatzeko. Oilar jokoan lau ziren nagusi baina bi sobran daude.

Inkestek bigarren itzulirako bozen ehunekoak iragarri dituzte jada: Sarkozyk %53 lortuko luke eta Royal gailendu. Hara, lehen txanda ebatzi gabe, batzuk bigarrenean ari dira jokatzen, hedabideak bereziki eta nagusiki.

Inkestak aipatu ditugu, eta ez dira amaitu. Igandean, inkestak eginen dituzte boz ontzien alboan. Esaterako, Le Soir en ligne kateak, arratsaldeko 19:30erako Irteneten ezarriko ditu boz asmoen inkesten emaitzak. Frantzian, legez, ezin dira inkesten emaitzak aditzera eman bozketa egunean, ez Hexagonoan ez itsasoz gaindiko lurraldetan, Frantziako Estatuaren lurraldetan, hitz batean. Alta, gaur gaurkoz, Internet espazio zehazgabe da Frantziako legedian.

Hedabideek markatu dute hauteskundeen kanpainaren erritmoa, baita hauteskundeen egunaren jite bera markatuko ere, antza.