Patarrari bolbora bota?

Atalak: (B)literatura

Sua nahi Mr. Churchill? liburua eskuetan ari ginen (*). Vladimir narrazioaren bigarren zatiko pasarte hau irakurtzen ari hain justu ere:  (…) “Txatoren aita erreketeetan ibilia zen, askotan kontatzen omen zion patarrari bolbora bota eta su emanda hartu izan zuela, gudarien muinoetan goiti artilleriarik gabe erasora abiatu aitzin. Hartarik edanak haiek guztiak, burutik zeuden”. (…)

Marian harritu zen, eta halaxe adierazi:
– “Patarrari bolbora bota?”
Tailerra osatzen dugun irakurle lagun batzuen aurpegietan harridura ageri zen, baita marmarra zabaldu ere:
– “Zergatik ez?” batzuek.  “Gerra unean…!?”
Harriduraz eta duda-mudan aritu ginen, eztabaidan.
Biharamunean, taldeko zenbait kideen artean e-mailak trukatu genituen. Nireak hauxe zioen:
– Patarrari bolbora bota, edan eta klik eta bizkor ibili? Non possible, Kantiniersa.
Alegia, mundu ikaragarri harrigarrian bizi gara eta ohitu gara esaten:  “Errealitateak fikzioa gainditzen du”.
Kasu eman dezagun. Errealitateak fikzioa gainditzen du baina oraindik ez dugu Superman hegaz egiten ikusi gure gainean.

Beste behin ere, pedante samar esanda edo izanda, hitz hauek berritu nituen:
– Ez dago ezer absoluturik. Absolutu bakarra Jainkoa da, eta bera ez da existitzen.
Alegia, artean, Superman bezala, bera ere ez baitut nire gainean pasatzen ikusi. Bai, badakit, badakit Jainkoarena fede kontua dela.

Eta gehiago luzatu nien irakurle kideei.
– Literatura irakurketa lantzen dugun lantegi honetan, “funtsa atzoko bezalako uneetan dago, nire gustuko”. Noski, gustua fedea bezala da, edo antzekoa. Alegia, bolbora edariari botatzea eta edatea “erreala” izan daiteke, baina ez ditzagun naturaren arauak ahantzi, biziko bagara behinik behin.
Edan bai, jan ere bai, baina…! Alegia, irakurri ere bai baina..!

* Egileak, Koldo Izagirrek, Hendaiako Mediaketan jardunen du ekainaren 20an (18:00etan)  Sua nahi Mr. Churchill? liburuaren karietara.

Literaturaren menturazaleok gonbidatuta zarete.