Nolako ortuak halako porruak

Atalak: (C)politika

Ortuak porruak tomateak...

Ajuria Eneak lehendakari abertzale bati eman zion ostatu hogeita hamar urtez, eta maizterrez aldatu da berriki”, idatzi dut ARGIAko nire azken lanean.

Jaurlaritza berria osatuz geroztik politikaren giroa aldatu da kazetariontzat. Lakuako egoitzetako pasiloetan beste giro bat usaintzen da, esate baterako.
Sarrerako lerro hauek idatziak nituen –datozen beste batzuk ere bai–, eta goiz honetan Idoia Mendiari neronek egindako elkarrizketaren harian “galdera erantzun artean, galdera aldean beldurra eta erantzun aldez segurtasuna agiri dala dirudi” irakurri diot Joxemari-ri –Interneteko testuan–. Irakurle horri horrela iruditu izana normaltzat –eta posibletzat–jotzen dut.
Datozen lerroak, politikako mintzalekuetan galdezka jardun ondorengo aburuak dituzu. Kazetari honek “denaz” ezin galdetuz, bere testuetan agertu ezin dituen gogoetak dira.
Eusko Jaurlaritzako Idoia Mendia bozeramailearen hitzen harian idatzitakoak honako hauek dira:
1. ETAk Patxi Lopez Lehendakaria jomugan dauka. Guk Lakuan (argazkilaria lekuko) horixe nabaritu genuen. Mendia andereari argazkiak ateratzeko unean, bizkartzainen hatsa garondoan sentitu genuen ozen eta etengabe une oro. Aznarren garaitik ez nuen halakorik horren nabarmen sentitu.
(Hitz hauek Joxemarik idatzitakoa irakurri baino lehenago idatziak nituen. Dena den, ez dut uste aipatu une horrek galderak egitean niregan eragina izan zuenik. Beste behin ere jabetu naiz, elkarrizketa generoa “artifizioa” dela. Eta beste behin ere, kazetari eskas lotsagabe ausart honek formulatzen dituen galderak gero aldizkarian idaztean leundu beharrez “desitxuratuak” agertzen direla. Mea culpa)

2.  “Gobernu honek PPren babesa jasoko du legealdi osoan”, esan zuen Mendiak.
Neronek: “Bai horixe! PPren babesa ezezik, ETAren laguntza osoa dauka eta jasoko du. ETAk Arrigorriagan eginiko agerpena lekuko. Lekuko eta berme”.

3. “EITBko historian ez da sekula zuzendari profesionalik izan, zuzendariek beti profil politikoa izan dute, alderdi buru edo alkate bukatu dutenak”.
Neronek: “Zuzendariak euskaraz jakiteak edo ez jakiteak ez omen du bermatzen kalitatezko telebista-irratia. Imajinatzen duzue TVEko edo France Télévisions-eko zuzendariek espainolez eta frantsesez jakin gabe, beren telebisten kalitatea bermatzen?

Ez dakit EITBk zuzendari profesionalik izan duenentz Alberto Surio izendatu aurretik, baina aurreko bik, jeltzaleek, Ortuondok eta Ortuzarrek kasu, oraingoaren profila posible egin dute. Nolako ortuak halako porruak.

Banituen puntu honi buruz pare bat galdera gehiago Mendiari egiteko, baina elkarrizketa 30 minutu beranduago hasi ginen, eta aipatu orduan (ordu bat genuen, ken 30 minutu beraz) amaitu behar izan genuen ezinbestean. Mendiak gobernu bilera garrantzitsua zeukan. Artega zegoena, izatekotan, bera zen (argazkilaria lekuko), lanez lepo baitzegoen, Idoiaren elkarrizketaren hasieran idatzitakoek aditzera ematen dutenez. Artega eta adeitsua, egiari zor.
Kazetari honek beldurra ez, agian oraindik ere zuhurragoa izaten ikasi behar du. Tira, agian gabe.

4. “Euskararen behar handiena erabilia izatea da, horretan lan egin behar dugu. Baina batzuetan eman den inposaketa ez da ona, ezta politikoki erabilia izatea ere. Euskara denona izan behar da”.
Neronek: “Euskara denona izatea baino inorena ez izatea, hobe”. Behin ere ez dut gaztelania edo frantsesa denona denik entzun.

5. Azkenik, baneukan beste kontu batzuk ere idatziak. Ezabatu ditut. Bego. Joxemarirena irakurri ondoren, idatzitako batzuk gaizki interpretatu litezke.