Akordatzen naiz…

Atalak: (E)gizartea

Krisi garaian lanpostu xumea atxikitzen duena,
oparotasun garaian baino aise ‘aberatsa’goa da”

Joseba Sarrionandiaren 'Akordatzen' liburuaren azala

Lan oporraldia tartean Blogeko nire jarduna eten nuen. Akordatzen naiz… opor aurreko agur modukoren bat idatzi gabe utzi nuela. Funtsezko deus esateko kuraiarik gabe nengoen nonbait. Orain, lanera itzultzean, hainbat kontuez akordatzen berrasi dut nire jarduera.

Akordatzen naiz… mendeko krisi ekonomiko handienaren lehenengo oporraldia zela. Erredakzioko azken bileran, lankideok opor onak desiratu genizkion elkarri, eta gutako batek krisialdien opor ostean etorri ohi den larritasun garairako oporretan indarrak biltzea komenigarria dela esan zuen.

Akordatzen naiz… ez niela mugikorrari ez posta elektronikoari kasu egin nahi, ezta irratiko, telebistako eta prentsako berriei ere. “Estatuko Fiskaltzaren ixteko eskaera baztertu, eta Egunkaria auzia epaituko du Auzitegiak” berri tamala ezagutu nuen haatik. Ezagutu nuen ere “Guardia Zibilaren aurka atentatua egin du ETAk Burgosen, eta 65 dira zaurituak” albistea. Eta geroxeago ETAk Mallorkan bi guardia zibil hil zituela… akordatzen naiz.

Akordatzen naiz… ez nuela udaldi oro errepikatzen diren ohiko berriak entzun nahi, baina berri zaharrak errepikatu ziren: “Villabonako zinegotzia Remi Aiestaran bihotzekoak jota hil da Ertzaintzarekin ika-mika aritu ostean”.

Ertzaintzak presoen aldeko manifestazioak sakabanatu zituela… akordatzen naiz.

Akordatzen naiz… ez nuela udaldi oro errepikatzen diren ohiko berriak entzun nahi, baina berriak betikoak ziren: “A/H1N! Gripea pandemia bilakatu da… Krisi mahaia eratu dute”. “Zorrak ordaindu ezinik dauden enpresak iaz baino %77 gehiago dira”. “Atzeraldia moteldu da, Alemaniako eta Frantziako BPGa %0,3 handitu da”. “Halere, adituek diotenez, ez gara inondik ere krisi aurreko garaian geuden maila ekonomikora itzuliko”.

Akordatzen naiz… Frantziako Tourra bukatu eta aste batera Mikel Astarloza txirrindulariak prentsaurrekoa eman zuela Donostian: “Badakit nire hitza laborategiko proba baten aurka doala, baina nire burua defendatzeko aukera besterik ez dut eskatzen. Errugabea naiz. Ez dut legez kanpoko ezer hartu, zin egiten dut”.

Akordatzen naiz… hainbat mendigoizale ez zirela etxera itzuli. Akordatzen naiz… ARGIAko Iritzi Sailean kolaboratzaile Joxe Mari Agirre Txato itzuli zela, betiko geratzeko alabaina.

Akordatzen naiz… beste hamaika albistez halaber. Esaterako, Usain Bolt jamaikarrak berriz ere 100 eta 200 metroko bere errekorrak birrindu zituela. “Mundutarron abiadurak ez du mugarik” pentsatu nuela… akordatzen naiz.

Aurreko hauek hedabideetatik heldu zitzaizkidan, baina bizitzak bestelakoak ere baditu:

Akordatzen naiz… auzokide berriak ezagutu nituela, mundu berri baterako bestelako bikoteak: emakumezko bik osatua bata. Bestea, hiru seme-alaba dituen bikotea. Hirugarren haurra biena dute. Lehena eta bigarrena, lehenengo beste bikote esperientzietan jaioak dira.

Akordatzen naiz… Hendaiako Hondarraitzen bainujantziz agerian aldatu nintzela eta emakumezko batek errieta egin zidala: “Lo que tendremos que ver todavía“. Opus Deikoa begitandu zitzaidan.

Akordatzen naiz… Hendaiako Euskal Besta iragartzen zuen afixak honela zioela: “Du 3 au 9 Aôut. Abuztuaren 3ra 9tik” (Sic).

Akordatzen naiz… erosketak egitera joan ginela eta erosketa saskia betetzean, aukerei arreta eta kasu emanez, hamabost bat euro aurreztu genuela. Handik gutxira alabaina, lagun batzuekin topo egin genuen, seme-alabak tarteko, eta tabernako erronda hamasei euro ordaindu genuela.

Akordatzen naiz antzeko beste hamaika kontuez. Berriki gertatuak, baina aspaldikoak balira legez… akordatzen naiz. Betiko kontuak izan arren, ahanzteko Blogera ekarri ditudanak. Ahanzteko eta Erredakzio kideekin ideia hauxe partekatzeko: “Krisi garaian lanpostu xumea atxikitzen duena, oparotasun garaian baino aise ‘aberatsa’goa da”.