Joxe Arregiri gutuna

Atalak: (E)gizartea, Erlijioa

Arantzazutik mundura doan enara

Kaixo Joxe, zer gisa? Ondo desio!

Joxe, nire pentsamenduetan leku egin duzu azken asteotan. Fraide frantziskotarraren ibilbidean hartu duzun erabakiaren berri izan dut Berrian lehenik eta Euskadi Irratian berrikiago.

Bizkitartean,  apaiz, fraide, herrikide eta lagun askoren atxikimenduzko hitzak irakurri ditut, hartu duzun bide berrian adore eman aldera. Bihoazkizu ere nire animuzko hitzak.

Kristau elkarteari sekulako galera datorkiola iragarri duzu, eta kristau elkartean agintzen duen Erromako Elizaren (Vatikanoaren) aurrean intsumisioaren jarrera hartu duzu.

Zure jarreraren aldeko hitzak dituzu ere nire hauek.

Ni ez naiz baina, zu bezala, Jesukristoren jarraitzailea. Zuk aldarrikatzen duzun Jesukristoren Ebanjelioaren bidean hezi ninduten, baita ibili ere. Arrazoiak arrazoi baina, bide hura utzi eta beste bideetatik menturatu nintzen. Egun, laburrean esanda, herritar laikoa nauzu, ez erlijiosoa, ez fededuna.

Nire adorezko eta atxikimenduzko hitzez gainera, proposamen batekin heldu nauzu gutun ireki eta labur honen bidez:

Eraiki ezazu beste eliza bat. Beste jendarte bat bilduko duen eliza. Euskal eliza berria. Erroma, Madril edota Paristik independentea. Euskal Herriak, munduko beste edozein herri batek legez, burujabe izateko eskubidea babestuko duen eliza.

Aizu, Joxe, baliteke zure jainkoak Kristoren eliza berritzeko  deia luzatu izana. Baliteke, Jesukristo berria Euskal Herrian jaio izana. Baliteke, XXI. mendeak behar duen Jesukristo berria zu izatea. Agian, elizaren zismaren garaia heldu da Euskal Herrira. Baliteke.

Kristautasuna berritzeko zure asmoetarako herri honek gogo eta leku ezin hobeagoak eskaintzen dizkizu nik uste: hara, udaldian, deitu itzazu herritarrak Urbia, Urbasa, Aralar edota Irati mendietara eta bildu itzazu zure izaeraren eta pentsaeraren araberako mezan. Neguan, berriz, herriarenak diren Frontoietan antolatu eta eraiki ezazu zure gustuko eliza.

Agian, erlijioen garaia joan da, eta zuk aldarrikatzen duzun Ebanjelioaren –berri onaren– ordua heldu duzu. Arantzazu, Begoña, Estibaliz, Leire edota Beloketik harago doazen bideak urratu behar dituzu agian, baita zuk onartzen dituzun herritar fedegabe eta laikoekin urratu ere.

Bide eta asmo horietan abiatzen bazara, bidaide eta gogaide izanen nauzu.

Beno Joxe, nire atrebentzia eta lotsagabetasuna ontzat hartuko dituzulakoan, jaso ezazu nire bostekoa!

Adeitasunez,

Mikel Asurmendi