Mirari eta misterio

Atalak: (C)politika, Historia

ETAko kideak eta anagrama

Mirari eta misterio. Horra ETA izendatzeko bi termino.

Frankismo garaian, bi hamarkadetan (1958-1978), ETA miraria izan zen. Euskal Herriak herri jarrai ahal izateko miraria.
Azken bi hamarkadetan (1998-2010) ETA misterioa da.

ETA fenomeno politikoa da. Herriarengandik sortzen den oro, espresio politikoa da. ETA espresio politiko, sozial, kultural, bortitza… da (lagunek esaten didate ez dela dena adierazi behar, ez dela komeni alegia. Bego hor).

ETA miraria eta misterioa dela esan dut. Izanik ere, sortu JELetik sortu baitzen. Jatorrian jainkoa izanik, ulergarria da mirari izatea eta misterio bilakatzea.

ETA, dena den, fenomeno politikoa da. Ukaezina da, niretzat. Eta ETAren izaera politiko horretan, giza historia politikoan izan diren adiera edo espresio guztiak aurki daitezke (tira, ia guztiak. Esateko modua da).

2010 urtera iritsita, lehen aldiz bere historian, ETAk herri honetako espresio politiko guztiak aurka dauzka. Arnaldo Otegi: “Si ETA matara mañana, la izquierda abertzale se opondría”.  (El Pais, 10-10-17).

Mario Zubiaga irakaslea elkarrizketatu dut berriki. ETA fenomeno politikoa ondo ezagutzen du berak. Berea da “El ethos de ETA” artikulu eta gogoeta, besteak beste.

Ez naiz ausartzen datozen hitzak Mario Zubiagaren ahotan ezartzen. Esan dezadan berak lagundu didala datorren gogoeta gauzatzen. Hitzak “nireak” dira beraz, ez Mario Zubiagarenak.

Hona, “ETA benetakoa gerta al daiteke?” galdera-erantzunaren harian nik ondutakoa:
[Aditu] batzuek lagungarria dela diote. Alegia, ETA benetakoa izatea –izatea, gertatzea, geratzea… – funtzionala izan daiteke. ETA benetakoa delakoak ETA zintzotuko luke. ETA zintzo bilakatuko luke. Mekanismo franko erradikala deitzen zaio horri. Fenomenoa horrela garatzeak moderatu egiten du prozesua, erraztu egiten omen du akordioa. Noski, ETA zintzoa delakoa erakundearen gehiengoa bilduko lukeen kasuan betiere.

Horiek hainbat teorikoren edo adituren  aburuak dira. Mario Zubiagaren ikuspegitik –berriz diot, hitzak nireak dira– ETA benetakoa izatea –geratzea edo gertatzea– ez litzateke lagungarria fenomenoaren amaierarako. Hobe, ETAren amaieran erakundean dauden guztiak batean eta batera geratzea.

Zer gertatuko den? Mirari eta misterio den fenomeno batengandik ez da jakiten samurra. Izanik ere, fenomenoa jainkoarengan funtsatua bada ere, fenomenoaren eragileok lurtarrok gara.

Hona, azkenik, Julen Arzuagaren (Argia, 10-07-25) aburua:
“Edozein gazte errebelde tratatu dute ETAn sartzeko helburua balu bezala”.