Mundu birtualean

Atalak: Hedabideak, Zientzia eta teknologia

Teklatu birtuala

Gero eta mundu birtualagoan bizi gara. Gure bizi ingurua gero eta arraroagoa bilakatu dela nioen aurreko orrian. Argiako  Iritziaren saileko edo salako lehiotik begiraturik bederen.

Argiako iritzi egileek beren tokia utzi ahala beste batzuek hartzen dute sailean idazteko zeregina. Batzuk, artean elkar ikusi gabe, egunen batean ikusiko dugulakoan agurtu ditut. Beste batzuk, modu birtualetan landutako harremanaren ondoren, elkar ikusteko parada izaten dut.

Hona adibide bat: Mondragon Unibertsitatera (HUHEZI) joan nintzen Joseba Azkarraga Etxegibel elkarrizketatzera. Aldi berean, Ainhoa Larrañagak hartu zuen Josebaren tokia, Josebak berak proposatua gainera. Modu birtualez harago, biak ezagutu nituen egun berean. Ezagutu edo elkar ikusi genituen bederen.

Jon Sarasua egon zen agurtzeko unean. Kolaboratzaileekin zenbait kasutan izaten dudan harreman birtuala azaldu nien:

– Adibidez, bada, beitu. Mielanjel Elustondo ez dut oraindik ezagutzen ere–, esan nien.

Elustondok ez du iritzi sailean idazten, baina azken bost urteetan bion artikuluak Argian agertzen direnez, lagunen batek edo bestek esan dit:

– Mielanjel ikusten baduk, goraintziak eman nire partez.

Nik berriz:

– Ondo da. Hartara nik lehen aldiz ikusiko nikek (*).

Lagunak, adarra jotzen ari ote nintzaion edo, aurpegi arraroaz so egin zidala azaldu nien HUHEZIko lagunei.

Jon Sarasuaren berbak ditut gogoan:

– Nik ezin izango nikek horrela bizi edo horrela lan egin.

Etxera bidean zera pentsatu nuen:

“Hau mundu arranoa! Teknologia medio, mundu gero eta ezkutuagoa da gurea. Ni –edo gu orobat– horrela bizi banaiz, nola bizi dira mundu birtual honetan erakunde bateko kide klandestinoak?”

(*) Dena esatera, jainkoari eskerrak edo, enkontru harrez geroztik Mielanjelek eta biok ezagutzeko edo agurtzeko parada izan dugu.