Testuketan

Atalak: (B)literatura, (D)kulturgintza

Oier Guillan eta Uxue Alberdi, Testuketan saioaren gidariak

‘Testuketan’ literatur saioa desagertua zela eta, Berriako Urtzi Urkizuk deitu zidan.

Erreportajea osatzeko hainbat galderari erantzungo ote nion galdetu zidan, baita egin ere. Erreportajea  iragan astean publikatu zen.

Hona nire aburuak bere osotasunean.

Euskal literatura umezurtz gelditu da uhinetan, ‘Testuketan’ desagertu ostean. Nola hartu duzu berria eta zer hausnarketa egin dezakezu?
Ustekabean hartu dut berria, baina ez nau harritu. Zoritxarrez, krisi ekonomikoa dela eta murrizketak etorri dira alor guztietan, eta ondorioz, alor ahulenetan murrizketak ez ezik, alor horiek desagertuz doaz. Literaturaren alorra, kasu, begi-bistakoa denez, gutxiengo baten alorra izaki, desagertarazten dute eta kito. Alegia, merkatua bilakatu den mundu honetan, sosik ematen ez duena desagertzera kondenatuta dago. Edo kondenatzen dute. Zoritxarrez diot.

Zer balantze egiten duzu ‘Komatxo artean’ saioan egin zenituen urteetaz?
Nire harroan, eta barkatu, oso ona. Hobeto egin zitekeen ziur asko, baina nik gidatu nituen urteetan (2000-20006) idazle askoren lanak eta literatur gai anitz jorratu genituen. Utriusque Vasconiae argitaletxeak plazaratu zituen bi liburuak (Komatxo artean 1 eta 2; elkarrizketak eta mahai-inguruak) lekuko edo ondare. Dena den, literatur zaleek eta egileek esatea hobe nik baino.

Euskal literaturak izan behar al du irratsaio propiorik Euskal Herriko irratigintzan?
Bai, prefosta! ‘Komatxo artean’ bideratzea lagun askoren lana eta ardura izan zen. Emaitzak eman zituen, eredua zaharkitu zen eta ‘Testuketan’ sortu zen, lau urtez iraun zuena. Erran nahi baita, saioak bazuela leku eta publikoa. Beraz, irratsaio propiorik berez irabazita dauka euskarazko literaturak, eta gainera oihartzun kaxa hori behar du literaturak, berezkoa. Irratia berebiziko bitartekoa da literaturak oihartzun hori izan dezan.

Erakundeek ez al lukete hori bultzatu behar?
Nire gustuko, saioa berez biziko balitz, erakundeen bultzadarik gabe, hobeto. Baina hara, errealistak izaki, literaturaren esparruak laguntza eta bultzada behar ditu. Gainera, konplexuak alde batera, hemen dena laguntzen, bultzatzen eta subentzionatzen da: arrantza, laborantza, burdingintza edota gastronomia. Beraz, literatura eta kultura orobat ere bai, ezta? Gainera, erakundeen dirua herritarrona da, entzuleona kasurako, bada bai, azkar bultzatu eta lagundu ere bai!

mikel asurmendi (kazetaria)