Presoak negu hurbilean

Atalak: (C)politika, (E)gizartea

Presoak etxera

Ursoa Parot eta Mattin Troitiño ezagutu ditut berriki.  Paule Sudupe eta Idurre Gallastegirekin telefonoz mintzatu ere. Presoen senideak dira.
Mikel Albisu Antza presoarekin ere hitz batzuk trukatu nituen posta bidez. Jon Bilbao Moro preso ohiarekin ere berba laburrak izan nituen. Jose Luis Elkoro preso ohiarengana ere hurbildu nintzen, artean preso zegoela, familiaren eta lagunen bidez.

Harreman horiek guztiak, kazetari gisa urratu ditut. Helburu eta asmo ezberdinak tarteko. Batzuk gauzatu dira, betetzuk ez. Harremanek beti uzten dute “zerbait”. Pasadizo batzuk kontatzeko modukoak dira, beste batzuk ez.
Presoak gogoan izan ditut azkeneko hilabete luzeotan modu ezberdinez, halabeharrez eta hala nahiez ere.
Ez omen da lirikarako garaia oraingoa. Lirikarako ezean, epikari leku (eskasa bada ere) egin diot ene buruan.
Xabier Lete plagiatuaren baimena eta aldez aurretiko barkamenarekin.

Presoak negu hurbilean

Ez nau limurtzen Barack Obamak
ezta Palinek beroan
kate bereko begi baitira
unez uneko lerroan
dakidalako irauten duela
neguak ere geroan
uda presente bihurtu arte
nor izanaren erroan.

Ez nau beldurtzen Lizarratikan
Garazirako izotzak
non dirudien bizirik gabe
Udalbiltzaren hilotzak
Anoeta-Loiola bidea
iluna baitu bihotzak
eta begien mila ernegai
iraganaren oroitzak.

Ez nau larritzen azken orduan
Zapaterok gal(du) beharrak
bide estua hesitu arren
Aznar-Raxoiren laharrak,
gazte berriak onduko ditu
borroken aihen zaharrak
gure oraina arrazoiturik
beste batzuen biharrak.

Bai, iluntzen nau baratzatikan
hondar loreak biltzeak
Aurresku eta lore sorta truk
presoaren umiltzeak
Espetxe aldi luze ostean
arnas gabe ibiltzeak
Amets kamutsen loa baitakar
luzamenduz hiltzeak