Aberri Eguna Itsasun eta Iruñean (II)

Atalak: (C)politika

Hasier Arraiz, Sorturen egoitzan, Donostian

Aberri Eguna kari

AB, Aralar, Alternatiba, EA eta Sortuk akordio estrategikoa egina dute, bidea egiten ari gara emeki. horren ondorio dira bi koalizioak: EH Bildu eta EH Bai. Nazio estrategia sustatzea da gure asmoa . Badakigu errealitateak oso ezberdinak direla, astiro-astiro joan behar dela, baina gelditu gabe.

Aberri Eguneko ekitaldietako bat Itsasun eginen dugu, beste bat Iruñean. Iparraldekoa, Enbata mugimenduaren 50. urteurrena gogoratzeko eta kideak omentzeko. Errealitate ezberdinetatik gatozen abertzaleon arteko elkarlana sustatzea nahi dugu, pixkanaka, nazio estrategia hori gauzatzen joateko.

Nik neuk, ilusio handiz bizi dut Aberri Eguna, Iparraldean egoera soziala aldatzen ari delako, Nafarroan aldaketarako zantzuak ikusten direlako. Arabatik nator ni, EAEz hitz egiten da, baina horren baitan errealitate ezberdinak daude, eta ni errealitate zehatz eta ezberdin batetik nator, Arabatik: Zazpigarren alaba. Orain arte pentsatu da, Araba herrialde eskuindar eta espainolista zela. Gaur egun, ematen ari den aldaketa soziala begi bistako da, gero eta euskaldunagoa eta abertzaleagoa da, gero eta ezkertiarragoa ere.
Belaunaldi aldaketak izan dira eta beste errealitate bat ari da gauzatzen Araban. Aldaketa dator, eta eragile politikoek ezin dugu atzean geratu, aitzitik, guk bultzatu behar dugu, datozen belaunaldiak beste haize batez heldu baitira.

Euskal Herriak marko politiko berria behar du

Gernikako Estatutuaren seme-alabetakoa naiz, gure belaunaldikooi esan zitzaigun gure arazoak Estatutu horren bidez konponduko zitzaizkigukeela. Bada, nire belaunaldiak ikusi du hori ez dela egia, egungo marko politiko juridiko honek arazoak konpondu beharrean, areagotu dituela zentzu askotan: euskara ez da normalizatua, gure kultura bizirik irauteko sekulako arazoak dauzkagu, eta ez daukagu ziur herri gisa bizirik iraungo dugun ere etorkizunean. Lurralde zatiketa eta horren ondorioak kontuan hartuta, gure belaunaldiak argi dauka dauzkagun bitartekoekin ez daukagula aski arazo horiek konpontzeko, eta herri honek bere erabakiak bere kabuz hartzea ezinbestekoa dela.

Gu jaio eta hazi gara burujabetza behar dugula konbentzituta. Guretzat pentsaezina da Euskal Herriaren erabakiak beste lekuetan hartzea. Guk erabaki behar dugu. Independentzia gure beharra da, eta gure belaunaldikoentzat horrela baldin bada, datozenak are eta konbentzituagoak daude horretaz. Geroz eta aurrerago joateko asmoz ari dira, datozen belaunaldiak gero eta independentistagoak dira. Abagune historiko baten aurrean gaude, gero eta ziurrago gaude, gaur egun daukagun markoa ez da egokia herri hau antolatu ahal izateko.

Izan ARGIAko bazkide: astekariko harpidedun edo argia.eusen laguntzaile