Euskara, interesak edota desinteresak trabatuta

Atalak: Euskara, Hezkuntza

Herriko hautetsiak, iragan otsaileko manifestazioaren ondoren, Herriko Etxean

Udan barrena sartu izanagatik, udaberri giroan bizi naiz. Udarik ez bada ere, udaberriaren esperantzak eramango gaitu udazkenera, pentsu dut. Esperantza, horra bertute korapilatsua, kristautasunean hezi garenon aldarte aldrebesa. Nietzsche filosofo alemaniarraren hitzetan heldu zait gogora: “Esperantza gaitzetako gaitzena da, gizakion oinazea luzetsi egiten baitu”.

Gogoeta horrekin atera naiz karrikara ekainaren eta uztailaren arteko mugetan. Euskara hartu dut jomuga. Euskara esperantzaren mugetan senti ohi dut sarri.   Karriketako paretetan idatzita dagoen historiaren arrastoan, egungo historia etorkizunean idatzia geratuko den esperantzan aritzen naiz.
“Horixe inozoa! Itxaro deitu beharko zenuke, Mikel beharrean”.

Antikristoren aburua berritu dut ene baitan: “Esperantza gaitzetako gaitzena da, euskararen oinazea luzetsi egiten baitu”.

Ohi baino ordu gehiago pasa dut azkenaldion herri kaskoan, hiru hitzordu izan baitut Herriko Etxean. Euskara, euskaldunon itxaropena, izan dut hizpide hiru hitzorduetan. Zehatzagoa izate aldera, Hendaiako Ikastolak behar duen egoitza berria hizpide izan dut Udal Kontseiluko hiru taldeen ordezkariekin.

Hendaiako Ikastolarako eraiki berriaren karietara manifestatu ginen iragan otsailean. Falloux legearen aitzakian –Victor Hugoren garaiko legea– suprefeta berriak Gure ikastola eta orobat Iparraldeko ikastolentzako egoitza berriak eraikitzea galarazi(ko) du. Manifestazio haren ondoren lerro-buru hau idatzi nuen: “Ez dugu arrazoirik gutxi garelako”.

Hala ere, esperantzak esperantza, aferak afera, arrazoiak arrazoi, manifestazio haren ondoren, egoitza berria eraikiko z(u)ela adierazi zuen Herriko Etxeak. Gero, berriz ezetz erran du. Arrazoiak arrazoi, aferak afera hau ere, esperantza aldrebesaren agerbide gisa edo. Izan ere, Frantziako Errepublikak berak –eta berez– trabatzen duena baino, Hendaiako udal oposizioak  –auzapezak bere taldean oposizio handiena duela baieztatuta– are zailagoa bihurtu du egitasmoa bideratzea.

Euskararen aldeko hiru jokabideak berretsi zaizkit: “Euskararen aldekoak”. “Euskararen kontrakoak”. “Euskararen alde, baina!”. Hots, “baina” dagoen tokian ipini “interesa” hitza –edo desinteresa–. Interesak edota desinteresak trabatuta dago euskara. (Des)interesa dagoen lekuan, irakurri “egoa” edota “boterea”.

“Ez dugu arrazoirik gutxi garelako eta gutxi horiek elkarren aurka dihardugulako  (des)interesak direla medio”.

“Esperantzak bizi zaitu gero, euskararen malerusak madarikatua” erran dit ene baitako ahots zapuztuak.

PS: Posta hau, Hendaiako Ikastola eta Herriko Etxea hizpide jarri nuen orain bi aste blogean. Hirugarrenetik lehena zen. Iratxoek eraman zuten norabait. Horra berreskuratua.