Urtarrilaren 27koa, Iruneron

Atalak: (C)politika, (E)gizartea, Ekonomia

Irungo grebalarien manifestazioa Colon-en

Urtarrilaren 27an Greba Orokorrera deitu du gehiengo sindikalak Hegoaldean. Goizeko 8:30etan abiatu naiz Hendaiatik Irunera, Colon etorbidea helmuga. Goizeko 10:30etan idazten ari naiz.

ARGIA aldizkariko langileok greba egitea erabaki dugu asanbladan. Administrazio, sustapen nahiz kazetaritza sailekook. Gehiengo osoz baietza eman diogu euskal sindikatuen gehiengoaren deialdiari. Kazetariok, haatik, grebaren jarraipena egitea erabaki dugu, jarraipenaren berri http://www.argia.eus gunean emanez. Interneteko kazetariak lantegitik bertatik ari diren bitartean, paperean dihardugunok tokian tokiko berriak igorri ditugu. Zenbait kolaboratzaileen laguntza ere izan dugu.

Hona laburrean idatzia, Colon etorbidea ibili ostean,:
– Merkatal guneak: Txingudi eta Mendibil saltoki-guneak irekita daude. Komertzio guztia irekia dago, oro har. Coloneko Eroski itxita dago –horra salbuespena– goizeko 9:00etan. Beste komertzioak, gehienak, irekita daude, bakar batzuk itxita. Tabernak, arropa eta oinetako dendak –artean hauek ireki gabe, baina irekiko zuten itxuraz– irekiak.
– Bankuak eta kutxak: irekiak denak.
– Ikastetxeak: Bidasoa Lanbide Eskola eta Pio Baroja (DBH) itxita. La Sallen eskolan ikasle eta irakasleak ari dira.
– Ospitaleko Laborategiko langileek –batzuek– greba egin dute.
Eskualdeko ospitalean eta anbulategietan greba egin dute zenbait arlotan. Gutxieneko zerbitzuak tarteko, normaltasuna da nagusi.
–  9:30etan autoen karabana pasa da Colon-etik, LABekoak dira. ELAkoak Zabaltza (Ensanche) plazan eskuko orriak banatzen ari dira. LABekoek bat egin dute eurekin. Donostiako manifestazio nagusira abiatzekotan daude. LABeko Ikerren eta ELAko Xabierren balorazioak jaso ditut joan aurretik: “Aurreko bietan baino eragin gehiago izaten ari da gaurko greba Irunen”.
Niretzat, kazetari gisa, esperientzia berria izan da. Bestelako kazetaritza molde bat jorratzen ari naizela sentitu dut, ez-ohikoa nire jardunean.

Iruneroko lokaletik pasa naiz Hendaiara bidean, oinez. Gipuzkoa Telebistako kazetariak grebaren segimendua egitera irten dira. Mikel tokayoa agurtu dut, tripodea sorbaldan daramala.
Ana lankidearekin –Iruneroko erredakzio burua– gelditu naiz. Greba eta krisia izan ditugu mintzagaiak. Krisia oro har, krisia gure ingurumarian: urtarrileko Irunero ez da artean kaleratu. Krisialdi arazoak arrazoi!

Autoan sartu naiz eta aspaldiko gogoeta berritu dut: “10-15 urteko ekonomia aldi oparoaren ondoren (Bibliako behi gizenen aldia) aldi meharra heldu zaigu (behi argalen aldia). Eta ez da heldu –hasieran batzuek zabaldu nahi bezala– “bi urteko paseko kontu” gisa, berriz ere, lehengo bonantza aldira itzultzeko. Ez, ez, ez… Krisialdia heldu zen/da luzaz eta bertan gelditzeko”.
Hirugarren greba deialdia izan da urte batean Hegoaldean. Greba deialdien eraginak eta protestak in crescendo doaz.

P. S. 1: CCOOk eta UGTek pentsioen erreforma lege akordioa sinatuko dute patronala eta Espainiako Gobernuarekin otsailaren 2an. Agian, hau ez da Espainia. Agian –zuberotarren gisara, agian!–.

P. S. 2: Otsaileko Iruneron kaleratuko den kronika. Agian.