Euskal Herriko Laborantza Ganbara garaile

Atalak: (C)politika, Ekonomia

Garapen Kontseilua (Baiona)

ARGIA astekariak datorren astean Iparraldeko Lurralde kontratuari eta Frantziako botereen erreformari buruzko erreportajea argitaratuko du. Lurralde kontratua Garapen Kontseiluak kudeatzen du. Euskal Herriko Laborantza Ganbara (EHLG) erakunde horretako partaidea da eta EHLGko lehendakari Mixel Berhokoirigoinek iritzi artikulua idatzi du (datorren astean argitaratuko den erreportaje horretarako) ganbara honek Garapen Kontseiluan duen lekua eta partaidetza aipatuz.

Atzo, –erreportajea amaitu ondoren– Baionako Auzitegiak (EHLG) absolbitu egin zuela jakin genuen. Pasa den urtarrilaren 29an hasi zen EHLGren aurkako epaiketa. Duela lau urte sortu, Euskal Herriko Laborantza Ganbara bezain fite, Paueko prefetak legez kanpoko elkartea zela adierazi zuen publikoki. Bere hitzetan elkartearen izaera, xedeak eta antolaketa ilegalak ziren, eta hartara, salaketa jarri zuen auzitegietan.

Atzoko ebazpenaren arabera salaketak oinarririk ez zuela frogatu da. EHLGko lehendakari Mixel Berhokoirigoin-ek garaipen mugarritzat jo zuen Baionako Auzitegiaren ebazpena. Bere hitzetan erabakia eta bizirikoa “tsunamia” izan da. Garaipen honek poz ikaragarria ekarri die elkartea sostengatu duten herritarrei.

Alabaina, elkarteko lehendakariaren eleetan, EHLG ez da garaipen honekin konformatzen, aitzina segituko du lanean, Frantziako Estatuak ofizialki eta instituzionalki berau onar dezan.

Lurralde kontratuari buruz Interneterako prestatu dugun idazkian esan dugunez “abertzaleak oraingoz petxero” dira. Artean, pozgarria da laborariak oraingoan garaileak jalgi direla ikustea.

– Irakurri Mixel Berhokoirigoini epaiketa hasi aurretik ARGIAn eginiko elkarrizketa