Larrun (III)

Atalak: (C)politika

Larrun mendia egunsetian

Neronek burututako azken lau Larrun gehigarrietan euskal gatazkaren gaia landu dugula esan dut lehenago. Euren sintesiek auziak egun bizi duen egoeraz gogoetatzeko balio dezaketelakoan, hona lerro batzuk.

2007koan “Biktimekiko enpatia eza gatazkaren sintoma larria” azpimarratu genuen. Eztabaidan parte hartu zutenen profil ideologia hau izan zen, aliritzira esanda: ezker abertzaleko libertarioa, ezker abertzale ofizialekoa, abertzale bakezalea eta establissementeko morroia.
Ondorioa: ez dut uste euskal herritarrok biktimen tokian –edonor dela biktima– jartzeko eta haiek sentitzen dutena hautemateko ahalmena hobeto dugunik.
2008koan “Jaurlaritzaren bide orria –Ibarretxe bide orrian harrapatuta–: Kontsultatik hauteskundeetara” nabarmendu genuen.  Eztabaidan aritu zirenen profil ideologia, aliritzira hau ere: ezker abertzaleko heterodoxoa, abertzaletasuneko moderatua, atxikimendu libreko abertzalea eta ezkerreko unionista.
Ondorioa: Politikagintza joko-lekua da. Gure historian garaile jalgi ziren eskuineko unionistek ez dute “gure” jokoan parte hartu nahi. Ez dute behar ere.
2009koan “Sinestu, adostu eta ausartu behar du abertzaletasunak” eraman genuen titularrera. Solaskideen profil ideologiak hauexek: eskuineko abertzale posibilista, ezker abertzale posibilista eta ezker abertzale utopista.
Ondorioa: abertzaleena Erdi Arotik datozen banderizoen  historia–eta istorioa– da, besteak beste.
2010eko titularrak “Normalizazioaren esperoan PSEren eta PPren arteko Ituna da transbertsalitate bakarra” dio. Solaskideen soslaietan, ezkerreko abertzale posibilista, abertzale utopista, heterodoxo, ortodoxo, baita abertzale unionista ez independentista antzeman uste ditut.
Ondorioa: demokrazia gauzatzeko unionistek landu nahi duten transbertsalitate delakoak ez du “gurean” balio. Demokraziari adjektibo askotxo itsatsi zaizkio/dizkiogu. “Gurean” espainiar demokraziak ez du balio eta euskal demokrazia gauzatzeko bide luzea dugu oraino. Demokrazia guztizko eta guztirako sistema dela, ulertu gabe betiere.

Larrun aldizkariaren azala