Ezetzaren gainetik baietza

Atalak: Aitatasuna, Amatasuna

Helduok sarri izaten dugun arazoetako bat ezetz esaten ez jakitea da. Baina benetan ez dakigu ezetz esaten? Nahikoa da haurrak dauden lekuren batean hamar bat minutuz gurasoei entzuten egotea, bi mila EZ entzuteko. Ezetzean oinarritzen den heziketak inguratzen gaitu. Baina zein ondorio ditu ezetzaren heziketak?

Zirrenik pentsatuko duzue exageratzen ari naizela, eta ez dela “ezetzaren heziketa” hain hedaturik dagoena. Ezetzaren heziketa ia ohartu gabe egiten da normalean. Haurrak erabat kontrolatu eta edozein gauza egiten hasterako ez, kontuz, geldi… eta horrelakoak esaten daudenek ematen duten heziketa da. Haurra zaintzen ari direla, haurraren mugimendu oro mugatzen duen hezteko era da.

Ezetzean oinarritzen den heziketa jasotzen duten haurrek, heldu direnean segurtasun gutxi izatea sor dezake, eta ondorioz, helduei ezetz esaten ez jakitea. Gainera, etengabe EZ entzuten duen haurrarentzat, laster, ezetzak ez du baliorik izango, eta horrek ezetzaren ordezko beste bide batzuk erabiltzea ekar lezake (oihuak…).

Ezetza baietz bihurtu eta ezetzari benetako balioa ematea da hori ekidin eta haurren magiaz gozatzeko bide bat. Nola? Erraza da. Ezetza SOILIK haurra edo beste norbait arriskuan jartzen duten edo benetan inolaz ere onar ezin daitezken ekintzetara mugatuz.

Haurrak, izatez, mugituak dira, esploratzaileak, jakin min bizikoak. Ez dute zer ikutu daiteken eta zer ez diskriminatzen, ez dute ahora zer eraman daiteken eta zer ez berez jakiten, ez dute espaloia eta errepidearen arteko mugaren zergatia ulertzen. Egunerokoan asko izan daitezke benetako arriskua suposa dezaketen egoerak, eta ezetza horietara mugatzen badugu, berehala ulertuko dute EZ, ez dela.

Seguruak diren eremuetan, gure erosotasunagatik edo gure beldurrengatik, ez, ez eta ez bada gure ahotik entzuten dutena, guztia ezarekin lotu eta ezetzak balioa galduko du.

Utzi haurrei lokatzetan ibiltzen, zikintzen, aske mugitzen, edalontzietan “txista” egiten, esploratzen, beraien mugak ezagutu eta gainditzen. Azken batean, ikasi ere, probatuz egingo dute eta.

Zenbat ez aldatuko dituzu baietzarengatik?